うちなあぐちスピーチ（挨拶）文例集 　

「実践うちなあぐち教本・散文編」より抜粋加筆修正

はいさい、ぐすうよう。いい新(にい)びちでえびる。今日(ちゅう)ぬ目出度(みでぃた)さや何(ぬう)にん譬(たとぅ)らりやびらん。新郎(みいむうく)ぬ三郎君とぅ新婦(みいゆみ)ぬ花子さん、うりに二とぅくるちねえにとぅてぃ、くり程(ふとぅ)ぬ果報(くゎふ)ぐとぅやねえやびらん。今日(ちゅう)ぬゆかる日まさる日に、新郎三郎君とぅ新婦花子さんはじみ、二たとぅくるぬちねえぬとぅうぬ家(やあ)にんじゅんぬんかい、心(くくる)から、う喜(ゆるく)びうんぬきやびいん。

我(わん)ねえ、今日ぬ披露宴ぬ司会(しくゎい)拝(うが)なとをいびいる勝連(かっちん)次郎(じらあ)やいびいん。どうでぃん、見知(みいし)っちょをてぃうたびみせえびり。

　さてぃ、新郎(みいむうく)とぅ新嫁(みいゆみ)え今日ぬ午後(ぐぐ)三時なかい、金城家ぬ親(をぅや)ふぁあふじぬいめんせえる仏壇(ぶちだん)ぬ前(めえ)うとおてぃ、何時(いち)迄(までぃ)ん互(たげえ)えに愛(かな)さすんでぃゆぬ契(ちじり)、結(むし)でぃちゃあびたん。かにてぃからぬ二人(たい)ぬ願(にが)えぬかなわとをるしいじやいびいん。今日ぬ御祝(うゆえ)えんかい、いめんそうちょをいびいるぐすうようんかい、うぬ事(くとぅ)、御案内(ぐあんねえ)、うんぬきやびいん。

　あんしえ、よういくうてんぐゎあや、時間得(い)いやびてぃ、新郎とぅ新婦ぬ行成(いちな)い、御案内うんぬきやびいん。

　新郎ぬ三郎君や金城太郎主(たらあすう)とぅ幸子あんまあとぅぬ間(ゑえだ)なかい五人(ぐにん)兄弟(ちょうでえ)ぬ三男とぅしち、一九七◯年一月一日に沖縄市んじ生(う)まりてぃ、うるま小学校、うるま中学校、うるま高校、うりから、うるま大学(でえがく)までぃ進学し、一九九二年三月(さんぐゎち)にうぬ大学、卒業さびたん。うぬ後(あとぅ)、大学うとおてぃ、習たる語学力(ぐぐぁくりょく)、生かすんでぃち、今(なま)、勤(ちとぅ)みとをる丸々貿易株式会社んかい就職さびたん。

趣味えあいゆかぬスポーツ上戸(じょうぐ)なてぃ、何(ぬう)やか、野球ぬましんでぃぬくとぅやいびいん。去年(くず)、作(ちゅく)たるザ・バチクァイズんでぃゆる野球チームぬキャップテンそをんでぃぬあたいやいびいどぅんしえ、友(どぅし)、親戚(ゑえか)ん達(ちゃあ)とぅぬ諂(ふぃれ)えぐとぅん良(ゆ)うし、でえじな、良い二才(にせえ)やいびいん。

　うりから、新婦ぬ花子さんや、糸満(いとぅまん)次郎(じらあ)たありい前とぅ鶴子(ちるこ)あやあ前とぅぬ間なかい、四人(ゆったい)兄妹(ちょうでえ)ぬ三なん女(ゐなぐ)ん子(ぐゎ)とぅしち、一九七◯年二月(にんぐゎち)一(ちい)日(たち)に糸満市んかい生(ん)まりてぃ、南部小学校、南部中学校、南部高校、うりから、南部大学までぃ進学さあに、一九九二年三月(さんぐゎち)にうぬ大学、卒業さびたん。うぬ後お、アミリカんかい渡てぃ、コンピューターぬ勉強(びんちょう)さあに、去年(くず)ぬ九月(くんぐゎち)に沖縄(うちなあ)んかい戻(むどぅ)てぃ、今年(くんどぅ)ぬ四月(しんぐゎち)からあ、兄(しいざ)とぅまじゅんコンピューター販売会社作てぃ、生(ん)まり島ぬ糸満市うとおてぃ販売店、出(んじ)ゃちょをいびいん。

　花子さんぬ趣味え琉球(りゅうちゅう)舞踊んでぃぬくとぅやいびいどぅんしえ、新人賞取(とぅ)いるたみ、ばんじ、うみはまとをんでぃぬくとぅやいびいん。今日ぬう二(た)とぅくるや官人(くゎんにん)すがいに、うみないびすがいんでぃ言(ゆ)る昔(んかし)からぬうちなあすがい、いっぺえ、ちびらあさいびいんやあさい。やしが、すがいやか、ちびらあさしえ、ぐすうようが見知っちょをるぐとぅ、う二とぅくるぬかあぎどぅやいびいる。

　う二とぅくるぬ馴い初(はじ)みぬくまきい話や、くぬ後(あとぅ)ぬ友(どぅし)ん達(ちゃあ)ぬ挨拶(いええさち)うとおてぃ御案内ぬあぬ筈(はじ)やいびいしが、我にん一言葉(ちゅくとぅば)びけえ、御案内さびら。三郎君ぬうるま大学三年ぬばす、うぬ学園祭んかい、琉球舞踊ぬ加勢(かしい)しいが来(ち)ょをたる花子さんとぅ知っちょをりいないびたしがどぅ、交際ぬ初(はじ)みんやでぃぬくとぅやいびいん。うぬ後、三郎君や花子さんぬ所(とぅくる)んかい幾(いく)むるしん通(がゆ)いがな通てぃ、今ねえし、まじゅんなたんでぃゆるくとぅやいびいん。

　新郎(みいむうく)新婦(みいゆみ)ぬ紹介や今、御案内うんぬきたる通(とぅう)いやいびいん。二所(たとぅくる)ぬちねえ、親戚(ゑえか)、腹(はろう)氏(じ)うりから友ん達さい、今までぃ、皆(んな)ぬ御陰(うかじ)なかいどぅ、ふどぅゐいてぃどぅちょをいびいしが、今から後お、ゆくん、諸(むる)ぬ助(たし)き、頼(たる)がきてぃ、いかんでえないびらんくとぅ、どうでぃん、良(ゆ)たさるぐとぅ、御(う)願(にげえ)えうんぬきやびいん。

あんしえ、新郎新婦ぬ今からぬ嘉例(かりい)、また、二所ぬちねえ、うりから披露宴んかい揃(すり)みそをちょをるぐすうようぬからた勝(まさ)い、願(にが)てぃ、我が挨拶とぅさびいん。今日や、忙(いちゅな)さる中(なあか)、めんそうちうたびみそうち、しでぃ果報(がふう)でえびる。 

■かりいちきゆる挨拶（乾杯ぬ音頭んでえ）

ぐすうよう、今日拝なびら。でえじな、忙(いちゅな)さる中、いがろうが友(どぅし)、青空太郎(たるう)君ぬ店小(まちゃぐぁあ)ぬ開店十周年記念ぬすうじんかい早々(へえべえ)とぅい参(め)んそうちうたびみそうち、にふぇえでえびる。我ねえ、太郎君ぬいぬちるみいぬ曇空次郎(じらあ)やいびいん。司会からぬ御指名やいびいくとぅ、嘉例(かりい)付(ち)きゆる御挨拶(ぐええさち)うんぬきやびら。

　太郎君が、くぬ「うちなあ古物屋(ふるむんやあ)」開店(くゎいてぃん)しゃしえ、くねえだぬくとぅねえそをいびいしが、月(ちち)ぬ走いや馬(んま)ぬ走いんでぃる云ちゃる、なあ、十年(じゅうにん)けえなとをいびいん。開店しゃびたるちゃあきえ、太郎君んかいや御無礼(ぐぶりい)やいやさびいしが、店小が十年持っちゅんでえ、じょうい思あらりやびらんたん。何がんでぃ言え、うぬ店(まちや)創(はじ)みたるばすから、沖縄ぬ昔物のお、なあきっさ、いきらさぬ、よねえ、とぅめえららんたくとぅやいびいん。

　太郎君のお、まあなありいが、あんし、うちなあ昔古物、とぅめえてぃ、回(みぐ)てぃが来ゃたらあ、分かやびらんしが、今ちきてぃ、くぬ店小ぬあしえ、いっぺえ、ひるましいむんやいびいん。うぬくとお、後から、太郎君からぐ挨拶(ゑえさち)拝(うが)まんでぃ思(うみ)いとをいびいくとぅ、太郎君、どうでぃん、企業秘密んでえ言みそうらんようい、語てぃくぃみせえいびりよお。

　やしが、何うんでぃ言ちん、くぬ「うちなあ古物屋」や次第(しでえ)に、あまくまんかい音(うとぅ)ぬ立っち、今いや、店小んかい来(ち)ゅうる御客(うちゃく)お、うちなあんちゅびけえやあらん、大和(やまとぅ)からぬ観光客ん、寄(ゆ)てぃ来ゅうんでぃぬくとぅやいびいん。うぬくとぅお、くぬ店小が、沖縄文化、広(ふぃる)みいるくとぅんかい、役立っちょをるしいじやいびいん。

  太郎君んかい、聞(ち)ちいねえ、沖縄物(うちなあむん)、ましする胆持(ちむむ)ちなかいどぅ、店小ん持っちょをる、儲事(もうきじく)、頼(たる)がきてぃえ、うぬゆうな商(あちねえ)やならんでぃ言るくとぅやいびいしが、うぬようなくとお言やんよをい、くぬ「うちなあ古物屋」が今からん、儲きゆるぐとぅ、また、ゆくん繁盛するくとぅ、また、太郎君、うりからいがろう友(どぅし)ん達(ちゃあ)ぬからた勝い、願(にが)てぃ、嘉例付きやびら。コップんかい酒(さき)ぐゎあ、ちゃさきいなあ注(ち)じみそをり。かりい。にふぇえでえびたん。

■新築祝（みいやあじゅくいすうじ）んでえうとおてぃぬ御礼ぬ挨拶

はいさい、ぐすうよう。今日や忙(いちゅな)さる中、我達新家作いぬすうじんかいめんそうちうたびみそうち、御拝(にふぇえ)でえびる。

去(んじゃ)る戦(いくさ)ぬ後(あとぅ)、親(をぅや)ぬ作(ちゅく)たる赤瓦家(あかがあら)やうちなあぬ文化財んでぃ思(うむ)てぃ、成いぬやくとぅれえ、何時(いち)までぃん、残(ぬく)し欲(ぶ)しゃあたしが、じまま古でぃ、天井(てぃんじょう)んあまくま、小穴(みい)ぬふぎてぃ、雨漏いさあに、工(くう)んならんなとをるむんやいびくとぅ、なあ、防(ふし)がらん、今、ふぇえとをるクンクリート家(やあ)、けえ作たるしじやいびいん。

ローン、うちなすしえ、今(なま)から三十年(さんじゅうにん)後ぬ定年(てぃいにん)ぬん過(し)じてぃぬ後どぅやいびいしが、うり迄(まで)え、こおぐん曲がらんぐとぅ、うみはまらんでえないびらん。バブル時分や手間(てぃま)あ、いちゃんだん、なんくる毎年(めえにん)ちゃあ上がいし、借金(うっか)あ、毎年、軽っさなてぃ行ちゅたんでぃぬくとぅやたしが今ぬ世(ゆ)やけえ変わてぃ、ちゃっさはまてぃん手間あ、なんぞお、上がやびらんくとぅ、借金ぬ重(んぶ)さあ、いちみとぅとぅま、いぬむやんでぃ覚悟(くゎくぐ)さんでえならんふうじやいびいん。

やしが、うりん、人並(ちゅな)みどぅやいびいる。童(わら)ん今からどぅふどぅうぃいてぃ行ちゃびいるむんぬ、ちゃあ、美(ちゅ)ら家(やあ)んかい住むしえましどぅやいびいる。

　今日や三味線(さんしん)弾ちゃあ、太鼓(てえく)打っちゃあ、うりから踊(をぅどぅ)いさあ、良う揃(すら)あち呉(くぃ)みそうち、すうじ座(ざあ)、はねえかち呉みそうち、いっぺえ、にふぇでえびる。

　また、下(しむ)うとおてぃ、まかねえすがやあん揃りてぃ呉みそうち、果報しやいびいん。今日ぬ御取(うとぅ)いむちいなかい、足らあんとぅくるお、許ちたぼうり。酒(さき)ぐゎあやひっかしてぃから、くぁっちいや諸(むる)、出(んじ)とをるうっさあ、うさがてぃから家やようんなあ、とぅめえてぃ呉みせえいびり。今日やいっぺえ、にふぇぇえでえびたん。

「実践うちなあぐち教本」から