見知(みいし)らん[1]従姉(いちく、いちゅく)�T

　　　　　　　　　　　　　　比嘉　清

新暦(やまとぅぐゆみ)ぬ十一月(じゅういちぐぁち)んでぃ言(い)ちん、昼間(ふぃるま)あ、未(なあ)だ、暑(あち)さいびいん。十月(じゅうぐぁち)ぬ初(はじ)み頃迄(ぐるまで)え、要用(いりゆう)やたる扇風機(しんぷうち)[2]ぬ要(い)らんなゆるうっぴどぅやいびいる。

十月ぬ半(なか)らから十二月初(はじ)み頃迄(ぐるまで)え、真夏(まなち)ぬ如(ぐとぅ)し、ふみちぇえ居(をぅ)らんくとぅ、凌(しぬ)じいやっさし(せ)え当(あ)たい前(めえ)ぬ事(くとぅ)がやらん分(わ)かやびらん。

やしが、四郎(しらあ)や思(うむ)やびたん。考(かんげ)えてぃ見(に)いねえ、童(わらび)ぬばす(そ)お、十月(じゅうぐぁち)ぬ終(う)わいまんぐるからあ寒(ふぃい)くなやびたん。学校(がっこう)ぬ衣替(くるんげ)えい、待(ま)たんようい、寒(ふぃい)くなゆたくとぅ、朝(あさ)あ、寒(ふぃい)さがたがたあさがなあ、学校んかい行(ん)じゃる覚(うび)いぬあいびいたん。

うんなある日(ふぃい)ぬ高昼間(だかふぃるま)、金城(かなぐしく)四郎(しらあ)ぬ携帯(きいてぃい)電話(でぃんわ)ぬ鳴(な)やびたん。鳴らちょおし(せ)え、彼(うり)が与那城(ゆなぐしく)ぬ親(をぅや)ぬ家(やあ)んかい住(し)どおる兄(しいざ)ぬ太郎(たらあ)やいびいたん。

「あぬよ、四郎(しらあ)、今日(ちゅう)ぬ朝(あさ)てえ、大(ま)ぎい主(すう)ぬけえ亡(ま)あちょおんでぃよお」

「あい、やんなあ。また、ちゅうちゃんやさやあ」

「ああくとぅよお」

「うぬ宮(なあ)城主(ぐしくすう)や病(やんめえ)どぅそおたがやあ」

「知(し)らなあ、だあ、近頃(ちかぐる)お、宮城(なあぐしく)ぬ音(うとぅ)沙汰(さた)ん聞(ち)かんくとぅ」

　四郎(しらあう)や、前々(めえめえ)から、与那城(よゆなぐしく)ぬ親(をぅ)ぬ家(やあ)や、西原(にしばら)[3]ぬ宮城(なあぐしく)ぬ家(やあ)とお隔(ふぃざ)み持(む)っちょおたる事(くと)お、粗々(あらあら)、分(わ)かとおいびいたん。

「あひよお、汝(い)ってえ、うが遠(とぅう)からあ、やしが、ないれえ、早(ふぇえ)く、あまぬ家(やあ)んかい行(い)ちゅんねえしすし(せ)え、まし(せ)えあらん？」

　四郎(しらあ)や、自営業(どぅうちゅいあちねえ)そおたくとぅ、彼処走(あまは)い此処走(くまは)いや、胴軽(ぢぅうが)っさ、する事(くとぅ)ぬないびたん。

「おお、あんしすさ」

　字(あざ)与那城(ゆなぐしく)お、宮城(なあぐしく)ぬ叔父(うざ)さあぬ村(シマ)とお隣字(とぅないむら)同士(どぅうさあ)やいびいたん。やしが、四郎(しらあ)びけんや、他(ふか)ぬ兄弟(ちょう)姉妹(でえ)とお変(か)わてぃ、かあま南城(なんじょう)市どぅ宿元(やどぅむとぅ)とぅそいびいたる。

「おお、なあ、あんしすさ」

「考(かんがげ)えてぃ取(とぅ)らしよお。だあ、我(わ)ぬん、ちゅてえ小(ぐぁあ)しから、すがてぃ佐知子(さちこ)とぅまじゅん、先(さち)なとおちゅさ」

　佐知子んでえ、太郎(たらあ)ぬ妻(とぅじ)やいびいたん。

　四郎(しらあ)や、仕事(しくち)んかい行(ん)じょおたる妻(とぅじ)ぬ智子(ともこ)ぬ携帯(きいてえ)電話(でぃんわ)鳴(な)らちゃあに、語(かた)やびたん。

「あぬよお、我母弟(わああんまあうっとぅ)ぬ宮城(なあぐしく)史春(ふみはる)叔父(をぅざ)さあぬ、今日(ちゅう)ぬ朝(あさ)、けえ亡(ま)あちゃんでぃよお」

「やんなあ。又急(あ)った事(ぐとぅ)やっさあやあ」

「やくとぅ、我(わ)のお、今(なま)から、行(ん)じ来(ち)ゅうくとぅ、汝(いゃあ)身(み)え、家(やあ)んじ待(ま)っちょおけえ」

「やんなあ、あんし、今日(ちゅう)や自一人(どぅうちゅい)し、行(い)ちゅるばあ？」

「へえ」

「あんしいねえ、明日(あちゃ)ぬ事(くと)お、如何(ちゃあ)なとおが」

「行(ん)じ見(ん)だんでえ、分(わ)からん」

「あんせえ、行(ん)じっ来(ち)、後(あとぅ)から語(かた)れえわ」

　四郎(しらあ)ぬ、西原(にしばら)ぬ宮城(なあぐしく)ぬ叔父(をぅざ)さあぬ家(やあ)んかい、うち着(ち)ちゃし(せ)え、うりから一時間びけん過(し)じてぃからやいびいたん。きっさ、夕(ゆ)さんないがたあなとおいびいたん。

　宮城家(なあぐしくぬやあ)ぬ屋門(やあじょう)や石門(いしじょう)やいびいたん。石門や戦(いくさ)前迄(めえまで)え、あまくまんかい残(ぬく)とおたんでぃぬ事(くとぅ)やしが、戦後(いくさあと)お、なあ古(ふる)でぃ、うかあさくとぅんでぃち、いいくる壊(くう)さっとおるむぬやいびいたん。今(なま)ちきてぃ、残(ぬく)とおし(せ)え、ふぃるましむんやいびいたん。

　うぬ石門(いしじょう)や、見(ん)ちん重(んぶ)らあさんあいびいたくとぅ、巡(みぐ)てぃ来(ち)ゅうる御客(うちゃく)ん達(ちゃあ)や、いいくる、「ちゃめ」んでぃち、叫(あ)びやびたん。

大(ま)ぎい主(すう)んでえ、宮城(なあぐしく)史春(ふみはる)ぬ徒名(あざなあ)なとおいびいたん。実名(しょうなあ)やか、言(い)い易(あ)っさんあたくとぅがやたら、村(むら)ぬ人(ちゅ)ん達(ちゃあ)ん、親戚(うぇえか)ん達(ちゃあ)ん、彼(うり)が同士(どぅし)ん達(ちゃあ)ん、諸(むる)、「大(ま)ぎい主(しゅう)」んでぃる言(い)ちょおいびいたる。

彼(う)っ達(たあ)世代(でえ)や必(かんな)じ、徒名(あざな)し呼(ゆ)だい合図(いぇえじ)さいする慣(な)りどぅやいびいたくとぅ、当人(じんてぃい)くる(お)お、嫌(んぱ)でぃん応(おお)でぃんないびらんたん。

大(ま)ぎい主(すう)や、六十(るくじゅう)前(めえ)頃(まんぐｒ)迄(まで)え、村会(すんくぁい)議員(じいん)ぬんそおたる事(くとぅ)んあてぃ、彼(うり)ぬ亡(ま)あちゃる其(う)ぬ日(ふぃい)、御悔(うく)やみ言(い)いが参(めえ)る御客(うちゃく)お、入(い)り違(ちが)あい違いし、まんどおいびいたん。

「あい、四郎(しらあ)。汝身(いゃあみ)え自(どぅう)一人(ちゅい)どぅやん？」

　四郎(しらあ)ぬ、声枯(くぃいかあら)らあんかい、とぅん返(けえ)えたれえ、後(くさ)あんかい、立(た)っちょおたし(せ)え、史春(ふみはる)叔父(をぅざ)さあ長女(ちゃくしゐなぐんぐぁ)ぬ米子(よねこ)やいびいたん。

米子や自(どぅう)ぬ父(すう)ぬけえ亡(ま)あちん、びってえんなとおる風儀(ふうじ)えあいびらんたん。彼女(うり)が意(い)地(じ)ゃあやんでぃ言(ゆ)しやか、父(すう)ん、なあ、逝(い)ちゅる時分(じぶん)どぅやるんでぃち、やすんじとおる風儀(ふうじ)どぅやいびいたる。

「んん、我(わん)一人(ちゅい)どぅやんどお、だあ、我(わ)っ達(たあ)智子や、仕事(しくち)ぬ憩(ゆく)ららなよお。やしが、明日(あちゃ)あ、まんな、来(く)らりいさ。あんし、出棺(しゅっくぁん)や何時(なんじ)にやが」

「明日朝(あちゃあさ)ぬ九時なかいや出棺やんでぃどお」

「うぬ早(ふぇえ)くなあ。我(わ)っ達(たあ)智子や、子(くぁ)ん達(ちゃあ)、学校(がっこう)んかい添(そ)おてぃ行(ん)じからどぅ来(く)らりいくとぅ、十二時(じゅうにじ)まん頃(ぐる)どぅないる筈(はじ)」

「おお、あんやてぃん、済(し)むんどお。汝(い)ってえ、あが遠(とぅう)からやるむぬ」

「汝(い)っ達(たあ)位牌(いふぇえ)抱(だ)ちゃあや、大兄(うふやっちい)ぬるすんなあ」

「へえ、あんやしが、彼(あり)え、明日(あちゃ)どぅ内地(ないち)から帰(けえ)ゆる」

「いぇえ、正敏(まさとしい)や内地(ないち)んかいどぅ居(をぅ)んばあなあ」

「あまんじ、建築(きんちく)関係(くぁんきい)そおんよお」

「あんせえ、内地(ないち)からやれえ、にっかないんてえ」

「朝(あさ)一番(いちばん)ぬ飛行機(ひこうち)やくとぅ、火葬(くぁそう)んかいや、かき合(あ)あゆる算段(さんみん)そおしが」

「やれえ、上等(じょうとぅう)やさ」

　仏壇(ぶちだん)ぬ前(めえ)んか置(う)かっとおる棺桶箱(くぁんちぇえばく)[4]ぬ中(なか)んかいや宮城主(なあぐしくすう)ぬ寝(に)んしらっとおいびいたん。四(し)郎(らあ)ぬ前(めえ)んかいや、二人(たいり)ぬ婆前(はあめえ)ぬ、彼見(うりん)ち、涙(なだ)くるくるうし、手巾(てぃいさあじ)さあに涙(なだ)、拭(ぬぐ)やあ拭やあそおいびいたん。二人(たい)共(とぅむ)に、大(ま)ぎい主(すう)ぬ従姉(いちゅく)やいびいたん。

「あいええやあ、大(ま)ぎい主(すう)、なあ目(みい)や開(あ)き能(ゆ)さんばあなあ。汝身(いゃあみ)え、なあ、うっさどぅ、物(むぬ)お、食(か)むんな？」

うぬ後(あとぅ)、うぬ婆前(はあめえ)ぬ言(い)ちゃる事(くとぅ)ぬ可笑(うか)さぬ、まんぐらぬ男(ゐきが)ん達(ちゃあ)や、笑(われ)えかんてぃい、けえ、そおいびいたん。諸(むる)、声出(くぃいん)じゃち、笑(わら)ゆしんにじとおる風儀(ふうじ)やいびいたん。

「あっさみよお、大(ま)ぎい主(すう)、死(し)に顔(がう)迄(までぃ)、肌(はだ)欲(ふ)しゃぎさそおる面(ちら)うちきしい喰(くぁ)てぃ。汝身(いゃあみ)えなあ、肌(はだ)あ欲(ふ)しゃあ無(ね)えらんどぅあんばあなあ」。

　また、なあ一人(ちゅい)ぬ婆前(はあめえ)や、

「あいええ、大(ま)ぎい主(すう)、汝身(いゃあみ)え、なあ案内(あんねえ)無(な)しく、去(は)いんばあなあ。やしがなあ、汝身(いゃあみ)んやがてぃ八十(はちじゅう)やせえ。良(い)いさくどぅやんどお、大(ま)ぎい主(すう)。却(けえ)てえ、汝(いゃあ)家組(やあぐな)[5]、煩(わちゃ)らさんようい、だでえまなかい、命(みい)落(う)とぅいそおくとぅ、しょう入(い)っちょおさ。何(ぬう)ぬ心配(しわ)んさんようい、逝(は)りよおやあ。汝妻(いゃあとぅじ)ぬウタん、あまんじ、男飢(ゐきがう)がりさあに、待(ま)ちかんてぃいそおる筈(はじ)やるむんぬ、とお、早(そう)まりい、逝(い)ちみそおれえ」

　うぬ大(ま)ぎい主(すう)二人(たい)ぬ従姉(いちゅく)婆前(はあめえ)にちいてえ、四郎(しらあ)や見(ん)ちゃる覚(うび)いやあたしが、だてえん、話(はなしい)さる覚(うび)いや無(ね)えやびらんたん。

うぬ一人(ちゅい)ぬ婆前(はあめえ)ぬ、とぅん返(けえ)えたれえ、四(し)郎(らあ)ぬ居(をぅ)る事(くとぅ)んかい気(ち)に付(ち)ちゃる風儀(ふうじ)やいびいたん。

「あいなあ、うんじゅお、前金城(めえかなぐしく)ぬ四郎(しらあ)やあらん？」

　前金城(めえかなぐしく)んでえ、金城(かなぐしく)四郎(しらあ)ぬ親(をぅや)ぬ家(やあ)ぬ家号(やあんなあ)やいびいたん。

「うう、やいびいんどおさい」

「あっさ、あんし見(み)い遠(どぅう)さる。大人(うふっちゅ)けえなてぃやあ。とお、我(わ)っ達(たあ)大(ま)ぎい主(すう)、見(ん)ち取(とぅ)らしえ、うり」

　婆(はあ)前(めえ)二人(たい)や四郎(しらあ)ぬ事(くと)お、良(ゆ)う知(し)っちょおる風儀(ふうじ)やいびいたん。棺桶箱(くぁんちぇえばく)ぬ側(すば)から離(はな)りゆしとぅまじゅん、今先迄(ななさちまでぃ)、しっくぇえはっくぇそおたる二人(たい)や、ちゅうちゃん、笑(われ)え顔(がう)んかいけえなやびたん。

　四郎(しらあ)や、二人(たい)ぬあった変(が)わい様(よう)んかい、いふぇえ、可笑(うか)さ思(うみ)いんさしが、にじてぃ、棺桶箱(わんちぇえばく)ぬ中(なか)んかい面伸(ちらぬ)ばがらち向(ん)きやびたん。あんし、手(てぃい)押(うさ)合(ゃ)さびたん。

　傍(すば)んかいや、大(ま)ぎい主(すう)長女(ちゃくしゐなぐんぐぁ)ぬ米子ぬ坐(い)ちょおいびいたん。大(ま)ぎい主(すう)妻(とぅじ)ぬウタあ、二(に)十年(じゅうにん)前(めえ)ぐれえんじ、けえ亡(ま)あちょおいびいたん。

「あが遠(とぅう)、那覇(なあは)から来(ち)取(とぅ)らち、果(か)報(ふう)うしどお、なあ」

「あらん、我(わ)のお、島尻(しまじり)、南城(なんじょう)市からどぅやんどお」

　此(く)まりかあぬ人(ちゅ)ん達(ちゃあ)にとぅてえ、南部(しまじり)方(ほう)まんぐらあ、諸(むる)、纏(まとぅ)みてぃ「那覇(なあふぁ)」でぃち、片付(かたじ)きとおる風儀(ふうじ)やいびいたん。くめえきてぃ、一(てぃい)ちなあ一ちなあぬシマぬ名(なあ)、言(ゆ)し(せ)え、煩(わちゃ)れえ事(ぐとぅ)やいぎさいびいたん。

「あい、やたんなあ。御無礼(ぐぶりい)なとおさ」

　だあ、んちゃ、四郎(しらあ)やてぃん、まる平生(ふぃいじい)や、くまぬ人(ちゅ)ん達(ちゃあ)とお、なんぞお、ふぃれえ事(ぐとぅ)んし(せ)え居(をぅ)らんどぅあくとぅ、くまぬ人数(にんず)ぬ四(し)郎(らあ)達(たあ)ぬ事(くとぅ)、くめえきてえ分(わ)からんてぃん、ふぃるましい事(くと)お、あいびらんたん。

　四郎(しらあ)や後(くさあ)んかい居(をぅ)たるたん前(めえ)とぅ替(か)わゆんでぃち、後(あとぅ)しんちゃあさびたん。其(う)ぬたん前(めえ)や、棺桶箱(くぁんちぇえばく)ぬ中(なか)、伸(ぬ)ばがてぃ見(な)あびたん。泣(な)ちいやさんぐうとぅう、大(ま)ぎい主(すう)とぅ物語(むぬがたい)小(ぐぁあ)する如(ぐと)おいびいたん。

「普通(ふつう)やれえ、寒(ふぃい)くないるばすんじどぅ、いいくる血(ちい)ぬ巡(みぐ)いぬ、悪(わ)っさなてぃ、脳溢血(のういっきち)んでえなかい、けえ亡(ま)あするむぬやしが、あっさ、汝身(いゃあみ)え、温(ぬく)ばあっとるばすに、けえ亡(ま)あすんでぃんあんなあ」

　うり聞(ち)ち、米子(よねこ)ぬ声枯(くぃいか)ら声(ぐぃい)し、大(ま)ぎい主(すう)ぬ代(か)わい、応(いれ)えやびたん。

「あらんどお、うんちゅうさい、我(わ)っ達(たあ)主(すう)や、温(ぬく)ばあっとおくとぅどぅ、けえ亡(ま)あちょおいぎさいびいんどお。昨日(ちぬう)や、かわてぃ、温(ぬく)ばあっとおたし(せ)えやあ、やくとぅ、我(わ)った主(すう)や、『うんなばあや、庭(なあ)ぬ草刈(くさか)らんでえ』でぃちゃあま、草刈(くさか)いかちそおたる風儀(ふうじ)やしが、どぅくまた、汗(あし)ぬ走(は)い強(じゅう)さぬ、日(ふぃい)ぬ熱(にち)負(ま)き、なやあにどぅ、けえ倒(とお)りとおたる風儀(ふうじ)やいびいんどお。あっさ、実(じゅん)に、庭(なあ)んじ物吐(むぬは)ち、ゐんちゃてぃ、倒(とお)りとおみせたんでぃ。隣(とぅないぬ)ぬカジャア[6]うんちゅうぬ、しょう脱(ぬ)ぎてぃ、助(たし)き起(う)くちゃるばす(そ)お、なあ、気(ちい)湿(し)ったとおみせえたんでぃさ。救急車(ちゅうちゅうしゃ)呼(ゆ)でぃ、病院(びゅういん)ぬんかい連(そ)おてぃ、行(ん)じゃるむぬやしが、だあ、一(ちゅ)けぬんちょおん、目(みい)ん覚(さみ)みらんぐうとぅう、今日(ちゅう)ぬ明(あ)き方(がた)、けえ亡(ま)あちゃるばすどぅやみせえんどお」

「いぇえ、あんどぅやたん？。んちゃ、昨日(ちぬう)や、温(ぬく)ばあとおたくとぅやあ」

「暑(あち)さん無(ね)えらん、寒(ふぃい)くん無(ね)えらんでぃ思(うむ)てぃ、油断(ゆだん)どぅんしいねえ、んちゃ、大事(でえじ)ないっさあやあ」

　米子や、其(う)ぬうんちゅうとぅぬ言(い)ちゃい外(は)ちゃい済(し)まちゃれえ、四郎(しらあ)ぬ側向(はたん)かやびたん。四郎(しらあ)ぬ兄弟(ちょうでえ)姉妹(うとぅだんざ)あ、高昼間(たかふぃるま)まんぐるなかい、伸(ぬ)ばがてぃから、きっさ、家(やあ)んかい戻(むどぅ)てぃ去(は)ちゃんでぃぬ話(はなしい)やいびいたん。あんやんでぃち、分(わ)かたれえ、四郎(しらあ)や、長居(ながいい)やならんでぃち思(うむ)やびたん。

　よういいふぃ小(ぐぁあ)、経(た)っちから、四郎(しらあ)や、米子んかい向(ん)かやびたん。

「とお、あんせえ、我(わ)のお、家(やあ)とぅめえらんでえないびらん。又明日(あちゃ)、来(ち)ゅうさ」

　四郎(しらあ)や、うち回(まあ)るう、そおたる御悔(うく)やみさあ達(たあ)んかい、御礼(ぐりいい)さがなあ立(た)っちゃびたん。

「果報(かふう)しどお、なあ、四郎(しらあ)。又(また)明日(あちゃ)ん、難儀(なんじ)し取(とぅ)らしよお」

　うぬばす、四郎(しらあ)や、ちゅうちゃん、いふぃえ、異風(いふう)なあ思(うむ)やびたん。

　親(をぅや)ぬ家(やあ)とぅ此(く)まぬ宮城家(なあぐしくぬやあ)とお、何(ぬうう)んでぃち隔(ふぃざ)み持(む)っっちゅんねえなたがやあ。

　やしが、四郎(しらあ)ぬ、ありくり、考(かんげ)えてぃん、分(わ)かゆるむぬ(の)おあいびらんたん。ただ、四郎(しらあ)が童(わらび)ぬばす、大概(てえげえ)、十年(じゅうにん)ぐれえが間(ゑえだ)、四郎(しらあ)ぬ母(あんまあ)かたくじら男(ゐきが)ぬ親(をぅや)とぅ大(ま)ぎい主(すう)が何(ぬう)がなぬ事(くとぅ)なかい、剋(くく)やたる事(くとぅ)ぬ覚(うび)いや、胸内(んにうち)深(ふか)くんかいあいびいたん。

祝儀(しゅうじ)ぬ支(し)こういぬ事(くとぅ)なかいがやたら、ユタ事(ぐとぅ)なかいがやたら、あらんでえ又(また)、政(しい)治(じ)んでえ札入(ふだい)りぬ事(くとぅ)なかいがやたら、二人(たい)ぬ親(をぅや)ぬ、けえ亡(ま)あちゃる今(なま)なてぃから、何(ぬう)ん分(わ)かゆるむぬ(の)お、あいびらんたん。

ただ、あいゆかんぬ酒(さき)いやたる四郎(しらあ)ぬ男(ゐきが)ぬ親(をぅや)ぬ、まるけえてぃなあ、酒飲(さきぬ)みがちいなあ、大(ま)ぎい主(すう)んかい、ごうぐちひゃあぐちする事(くとぅ)ん又、肝(ちむ)ぬ覚(うび)いぬあいびいたん。

家(やあ)とぅ宮城(なあぐしく)ぬ家(やあ)ぬ事(くとぅ)にちいてぃ、四郎(しらあ)んかい言(い)ち聞(ち)かする家組(やあぐな)あ、誰(たあ)ん居(をぅ)いびらんたん。何(ぬう)ぬ事(くとぅ)にちいてぃぬ高足(だかびしゃ)遣(じけ)えがやいびいたら。

　くぬ前(めえ)、居(をぅ)らんなたる四郎(しらあ)ぬ母(あんまあ)、世音(よね)や、西原(にしばら)んかい住(し)どおる自(どぅう)ぬ妹(うっとぅ)二人(たい)ぬ側(すば)んかいや、四郎(しらあ)が小(くう)さいにいや、いいくる遊(あし)びいが連(そ)おてぃ行(い)ちゅたるむぬやしが、何(ぬう)がやら、弟(うっとぅ)ぬ史春ぬ側(はた)びけんかいや、連(そ)おてぃ行(い)かったる肝(ちむ)ぬ覚(うび)いや、なんずかあ、無(ね)えやびらんたん。

　四郎(しらあ)ぬ男(ゐきが)ぬ親(をぅや)とぅ剋(くく)やたんでぃ言(ゆ)しやか、却(けえ)てえ、母(あんまあ)とぅが剋(くく)やたらあ、今(なま)とぅなてえ、なあ分(わ)かやびらん。

「とおあんせえ、明日(あちゃ)やあ」

　声枯(くぃいか)らあ米子や、あん言(い)ち、従弟(いちゅく)ぬ四(し)郎(らあ)、門口(ぞうぐち)迄(までぃ)、仕(ちけ)えさびたん。

　門口(ぞうぐち)ぬ傍(はた)んかいや、四郎(しらあ)ぬ見(ん)ちゃる覚(うび)いぬある女(ゐなぐ)ぬ立(た)っちょおいびいたん。

一目(ちゅみ)、見(ん)じいねえ、歳(とぅし)え、分(わ)かい難(ぐり)さたしが、いやでぃん、三十半(さんじゅうなか)らぐれえや、あらんがあらんでぃ思(うま)ありいやびたん。婦人(あんまあ)風儀(ふうじい)んやし(せ)えやいびいたしが、また、ゆゆ美(じゅ)らさんあたくとぅ、なあだ若女(わかゐなぐ)ぬ如(ぐとぅ)んあいびいたん。やしが、後(あとぅ)から聞(ち)ちゃる話(はなしい)なかいや、実(じゅん)ねえ、四十余(しじゅうあま)いやたんでぃぬ事(くとぅ)やいびいん。

　肌(はだ)色(いる)ん白(しる)さぬ、さじりとおる鼻(はな)あ、高(たか)ねえいし美(ちゅ)らさい、黒(くる)スカートから出(ん)じとおる足(ふぃさ)ん黒(くる)ストッキング履(は)ちょおいびいたしが、若女(わかゐなぐ)ぬ足(ふぃさ)ぬ如(ぐとぅ)、さじりとおいびいたん。

　女(ゐなぐ)ぬ色香(いるか)あ、四郎(しらあ)ぬ目鼻(みいはな)んかい、やふぁやふぁとぅ入(い)っち来(ち)ゅうる如(ぐと)おいびいたん。

　やしが、一(ちゅ)てえ小(ぐぁあ)しいねえ、四郎(しらあ)や、うん如(ぐと)おる女(ゐなぐ)、見(ん)ちゃる覚(うび)いぬあんでぃし(せ)え、勘(かん)違(ちげ)えがやたらあ分(わ)からんでぃ思(うみ)ゆんねえないびたん。何時(いち)ぬ間(みい)がやら、四郎(しらあ)や、女(ゐぬぐ)ぬ後風儀(うしるふうじ)[7]、ちゃあ眺(なが)みいそおいびいたん。

　いやでぃん、学生(がくしい)時分(じぶん)とぅか、別(びち)ぬ所(とぅくる)ぬ女(ゐなぐ)とぅるばっぺえとおる筈(はじ)んでぃ、思(うむ)やがなあ、女(ゐなぐ)ぬ面(ちら)あ見(ん)だん振(ふう)うなあさあに、石門(いしぞう)から出(ん)じらんでぃそおたるばすやいびいたん。

「はいさい[8]」

　美(ちゅ)ら声(ぐぃい)なかいする合図(ええじ)ぬ聞(ち)かりやびたん。声(くぃい)ぬ主(ぬうし)え、うぬ見(み)い知(し)らん女(ゐなぐ)ぬ物(むん)やいびいたん。

　四郎(しらあ)や、いちゃっさ、とぅぬまぬうそおいびいたがやあ。思(うま)あじふらあじ、同(い)ぬ如(ぐとぅ)、

「あい、はいさい」

んでぃち、応(いれ)えやびたん。

「うんじゅお、与那城(ゆなぐしく)ぬ前金城(めえかなぐしく)ぬ四郎(しらあ)どぅやみせえさに」

「やんどお」

「我(わん)ねえ、高江洲(たけえし)麻里子んでぃ言(い)ちょおいびいさ、見知(みいし)っっちょおてぃ呉(くぃ)みそおれえ」

　四郎(しらあ)やふぃるまさ思(うみ)いさがなあ、いふぃえ、どぅまんぐぃてぃが居(をぅ)たらん分(わ)かやびらんたん。

　見知(みいし)らん女(ゐなぐ)どぅやる筈(はじ)やしが、何(ぬう)んでぃち、自(どぅう)ぬ名(なあ)知(し)っちょおがやあ。

「初(はじ)みてえ、あいびらんどお」

　んでぃち、麻里子や、「んふふ」んでぃち、目(みい)笑(われ)えさびたん。

　四郎(しらあ)や、ゆくん、とぅぬうまぬうさびたん。みったい、まあぬ誰(たあ)がやたら。

　女(ゐなぐ)お、四郎(しらあ)ぬ、とぅぬうまぬうそおる面(ちら)目(みい)口(くち)見(ん)ち、今度(くんど)お、薄(うす)笑(われ)えさびたん。

「かあま早(ふぇえ)くに、くまぬ十五夜(じゅうぐやあ)ぬ村(むら)遊(あし)びぬばすに、いいくる、行逢(いちゃ)あてえ見(な)あびらんたん？」

　覚(うび)らじに、四郎(しらあ)や面々(ちらぢら)あとぅ、女(ゐなぐ)見(な)あびたん。

あんし、だでえまなかい、まるまるうとぅ、思(うび)い出(ん)じゃさびたん。肝内(ちむうち)んじ、「あっはあ」んでぃ、叫(あ)びやびたん。

「あい、思(うび)い出(ん)じゃちゃさあ。行逢(いちゃ)いや、さしが、うんにいや、話(はなしい)さる覚(うび)いや無(ね)えらんたしがるやあ…」

　確(たし)かに、うんにいや、四郎(しらあ)や中学校(ちゅうがっこう)ぐれえどぅやたい、また、あいゆかんぬ知(し)らん人(ちゅう)んやたくとぅ、他所(ゆす)ジマぬ人(ちゅ)とぅ話(はなしい)する存(じん)分(ぶん)ぬある訳(わき)え、無(ね)えやびらんたん。

「あんやたしが、我(わん)ねえ、良(ゆ)う覚(うび)いとおたんどお」

「いぇえ」

「なあ、家(やあ)んかいどぅやんなあ」

「だあ、なあ家(やあ)とぅめえらなんでぃ思(うむ)てぃどぅ、立(た)っち、来(ち)ょおしが」

「あんし、うんじゅお、家(やあ)や、何処(まあ)やくとぅ？」

「かあま南城市どぅやしが…」

「あが遠(とぅう)なあ、やしがあんせえ、安慶名(あぎなあ)あ道(みち)しがらどぅやせえ、とお、我(わん)、汝車(いゃあくるま)んかい乗(ぬ)してぃ取(とぅ)らさらんなあ」