今日(ちゅう)ぬ屁(ひ)や誰(た)がひちゃが（ユナグシクムニイし）　2006/11/30
　ユナグシクんじえ、童(わらび)んちゃあが遊(あし)どおるばす、屁ひいぬ音(うとぅ)とぅかじゃぬひいねえ、いいくる誰がらが、歌いぬ遊(あし)び歌があいびいたん。一音（一音節）ぬかじ、人(ちゅ)差し指(いいび)なかい、一人(ちゅい)なあ一人なあ、指すぬばすやいびいたん。歌あ次ぬぐとおるむんやいびいたん。
　♪今日ぬ屁や誰がひちゃが、ふるぬ通(とう)しぬ穴(みい)小(ぐぁあ)ゆう小、ひっちゃる屁♪
　あひ、一番後(あとぅ)んじ、指さったる人お、今先(なまさち)、屁ひちゃる人とぅさったるばすやいびいん。一音なかい二人(たい)びけえ、指すぬがんまらあん居(をぅ)たくとぅ、喧嘩(おおええ)ないるばすんあいびいたん。やひが今(なま)あ、うんな遊びん無(ね)えらんないびてぃ。
ゆう小＝穴小んかいかきたる語呂合わし
あひ＝あんし
やひが＝やしが

性善説・「性善説」「性慾説」　　<２００２年１０月１４日>

　北海道ぬ食品会社が自（どぅう）が売いぬ肉食品ぬラベルがゆくしやたるくとぅぬ、けえ分からってぃ、うぬ会社あ、詫びとぅし、うったあ食品買おたる御客んかい、レシートぬ無えらんてぃん、銭払え戻すんでぃ決わみてぃ案内さびたくとぅ、ちゃっさきいぬ客（推定４倍）ぬゆしりまんでぃ、なあ、ふしがらんたんでぃぬ事やいびいん。あんし、払え戻する事、やみたんでぃぬ事やびいしい。あんしから、ＴＶ番組ぬ人んちゃあや、うむさあくゎったあし、「政府厚生省や、業者あ、むる良い生まりやくとぅんでぃち、業者信用し、会社あ、客お、むる良い生まりやんでぃち客信用そおたるばすやいびいしが、政府お、業者なかい裏切らってぃ、業者あ、客なかい裏切らてぃ」んでぃち解説そおいびいたん。あんしから、「性善説（孟子）」「性悪説（荀子）」ぬ話ないびたしが、うりかあや、ちゃっさ考えてぃん、ちゃんないびらんくとぅ、でぃちゃ、今いや、「性慾説」やてぃん、考えてぃなあびらサイ。「性慾説」んでえ、人お、慾持っち生まりとおんでぃぬ話やいびいん。慾んかいや、良い慾んあれえ、やな慾んあしが、うりん又考え様ないびてぃ、銭儲きん、良い事やるばあん、あい、やな事やるばあんあいびいん。立身すしん、良い事やるばあんあれえ、やな事やるばあんあいびいん。一ちぬ慾んかい、裏表あるばあやいびいん。自せえ、良い慾んでぃ思いてぃん、人ぬ見じいねえ、やな慾なてぃ見いゆるばすんあいびいん。何がくぃい成とおらあ、分からんなとおいびいっさ、んでえ言みそうんな。くさむにいしん、何ん成いるむのお、あらんしが、「性慾説」なかい、考えしがる当たてえ居いびらんがやあんでぃゆるウッピ。

字クチンダぬ十五夜ぬ村祭　　＜２００２年１０月５日　ユナグシクむにいなかい＞

　なあ、「十五夜祭」んでえ、死語が成とおらあんでぃ、思いとおたひが、クチンダぬ字クチンダんじえ、今ちきてぃ、有んでぃぬ事やいびいん（んまぬ他なかい、ウチナアんじえ、なあ、一とぅくるん有んでぃぬ事）。祭え、三日が間（ゑえだ）さびいんでぃしが、毎日４０演目びけえ、さびいんでぃぬ事。しこういむこういや一け月前から、片付きへえ、一週間あまいかかいんでぃぬ話やくとぅ、じまま、まぎい祭やたる筈。我ったあが、くうさいにいや、十五夜や村々ぬかあじ有たくとぅ、初みに日や、どぅうぬ村（ユナグシク）、なあ明日あ、あんまあ生まりジマぬニシバル、うぬまたなあ明日あ、はあめえ生まりジマぬカッチンぬヒンナんでぃち、みんぐゎあみんぐゎあし、行じゃるむんやいびいたん。ヤキナんかい見いが行じゃる事んあいびいん。ヤキナぬ組踊や、「アマワリぬ話」がやたらあ、やな覚い小どぅほおひが、「チャンバラ」ぬばす、舞台ぬ柱（はあや）ぬ上辺（わあび）から、按司ぬ跳ぬじゃあに、とぅんもおたるあたい、「過激」やたひが、でえじな、うむさいびいたん。クチンダんかいや、今度お、行ちいはんたひが、やいや、必じ、行けえやあんでぃ、思いとおいびいん。

注：思いとおたひが＝思いとおたしが。やな覚い小どぅほひが＝やな覚い小どぅそおしが。行ちいはんたひが＝行ちゆうさんたしが。

戦後生まりぬ大うちなあぐち　＜２００２年９月１５日＞　
　先週ぬ週末、前原高校ぬ同期ぬ女（ちゅ）ぬ、小料理店ぬ開店祝いんかい呼ばってぃ、ぬばがたれえ、２〜３名や、那覇んじ、いいくる模合さいそおいびいたくとぅ知っちょおりいやいびいたしが、大概や初みてぃ？ぬ人ん達。前高ぬ同期生んでぃ言ちん、クラス（学科）ぬ違いねえ、大概やなあ、諸知らん人なてぃ、ひるましむんでぃ思とおいびいたしが、次第次第に、うりえ誰やたん、ありえ誰やたんでぃ分かてぃ来ゃれえ、はじめえ、大和口なかい「◯組ヌナニガシデシタガ、オボエテイマスカネー」んでぃち、挨拶そおたる人ん達ん、あったに、諸うちなあぐちなかい話しいはじみやびたん。後お、終迄、１００（ー１）パーセント大うちなあぐち。
　大概や諸グシチャーシンカやいびいたしが、あんすかなあまでぃん、うちなあぐちあびゆうすんでえ、思あんたくとぅ、まあから、驚ちゃびいが。でえじなゐいりきさぬないびらんたん。大概うちなあぐちゆんたく会ぬ如どぅあいびいたる。カラタぬしわし、なんずかあ、飲まん胆合やいびいたしが、だあ、ちゅふぁあら、にっかまでぃ飲むぬ事んかい、けえないびたん。うちなあぐちが今ちきてぃガンジュウなてぃ、あらげえとおる事お、「予想以上」やいびいん。
　一人が我にんかい、「比嘉さんカッチン人やたる筈やしが、言葉あ、聞ちいやっさあさあ」んでぃ言やびたん。我ねえ、「あらんどう、今あびとおしえ、いったあんかい、合あちょおるうっぴどぅやる」んでぃ、いれえやびたん。

今に生ちちょおる組踊言葉　　＜２００２年８月２０日＞

　ヨナグシクぬヤキナんかいや、「やあや」んでぃぬ組踊言葉ぬ今っちきてぃ残とおいびいん。戯曲集んかいや「やあ、やあ」でぃち表記さっとおいびいしが、発音や組踊んヤキナ言葉ん、いぬ「ヤーヤ」「ヤアーヤ」やいびいん。うぬ言葉出じゃるするばす（場面）ぬいぬむん成てぃ、気に入らんばすんじ出じゃする言葉（感嘆詞）やいびいん。イントネーションまでぃ、似ちどぅ居くとぅ、何がな、＊いそうはぬないびらん。
　また、我ったあ、過じたあんまあや、いいくる、嫌な事んでえ、気に入らんばすお、「あようい」んでぃ声出じゃさびいたん。あんしまた、長姉ん次姉ん、母ぬねえびし、いぬぐとぅ、今ん「あようい」んでぃ言るばすん、あいびいん。うりん、組踊ぬ「あれやうい（アリヨーイ）」とぅ、ゆう似ちょおいびいん。組踊え、てえげえ、どぅくヤマトグチぬ多さぬ、ならんさあんでぃ思ゆるばすん、あいびいしが、かんし、じゅんに有ぬ口語うちなあぐちん、ゆう使とおる所んまんどおいびいん。

註：「いそうはん（ユナグシクムニー）＝いしょうさん（シュイムニー）」や『沖縄語辞典』んかいや「文語」ち有しが、ユナグシクんじえ、今ん、じゅんに話言葉其ぬむんどぅやいびいる）

チョンダラー論争　　　　　＜２００２年８月３日＞

　２００２年８月１日ぬ琉球新報朝刊ぬ市町村コーナーんかい「チョンダラーに賛否」ぬ見出しなかい、沖縄市青年団体協議会主催ぬエイサーシンポジウムぬ記事ぬ載とおいびいたん。
　チョンダラーんかい賛成反対ぬ意見ぬ有たんでぃぬ事。いいばすやくとぅ会場んじ、カッチンエイサーやてぃん、ユナグシクエイサーやてぃん見してぃから議論すしえ、ましえあらんたがあらんでぃ思やびいん。あんしねえ、チョンダラーんかい反対んでぃ言る意見や出じらんたぬ筈やいびいん。カッチンユナグシクまんぐらんじえ、チョンダラーやエイサーぬ前座とぅさあい、舞うらりやびいしが、うりえ、エイサーしんか呼び寄してぃ迎えゆる民百姓ぬ喜び表わする胆合なてぃ、今いや、なあ、エイサーとお、車ぬ両輪ぬ如なてぃ、チョンダラー踊いぬ無えらんエイサーや味付きゆし忘りとおる食み物とお、いぬむん、胆んふがんむんなとおいびいん。
　我ねえ、いいくる勝連エイサー祭んかい家ぐな揃てぃ行ちゃびいしが、一番ぬゐいりきむんや前座チョンダラー踊いどぅやいびいる。うぬちびらあさあ、なあ組踊んかい負きらんしゃくぬ芸術ぬ域んかい有んでぃ思いとおいびいん。去年お、わざわざ、与那城からチョンダラーぬ被じ物借てぃ来ゃあに、我達、武富ハイツ祭ぬ道ジュネエんじ、チョンダラー踊さるむんやいびいん。くぬチョンダラーぬ評価ん、ちゃんとぅ、しいゆうさな、「本来必要ない。技芸を乱しており、なくすべきだ」んでぃ考えとおる人ぬ「エイサー解説者」やんでぃぬ事やいびいくとぅ、あきさみよ、何から驚けえ済まびいが。あんそる「解説者」なかい、「解説」さりいるエイサーん胆ぐるしいむん。沖縄ん、たった、むぬ分かゆる人ぬいくらくないびてぃ、後々ちゃあがなてぃ行ちゃびいらあ。

六月ウマチイ　　＜７月２7日＞

　３日前、六月御祭うさぎいが、ユナグシクぬ門中しんかとぅ揃てぃナカグシクんかい、ゆしりやびたん。
　我にん、六月御祭や、小（くう）さいにいんじ、行じゃるまま、長えが間、行じえんじゃびらんたしが、他ぬしんかん、いぬむんやいびいたる風儀。うぬナカグシク某元家や、何時ぬ世ぬ祖先がやらあ、かちみらりやびらんたん。家系図から、３〜４名ぬ祖先が、かちみらりぎさあやしが、世が、むさっとぅ違ゆくとぅ、よねえ、分かやびらん。拝みんうちなちから、我ったあ門中ぬ代表ぬ、んまぬ家ぬ主ぬ妻あんまあんかい、尋にやびたん。
「くまあ、何時ぬ世ぬ人ん達が、崇みらっとおいびいら」
　４０過じまんぐらがやらんでぃ思ありいる家ぬあんまあや、大和口し、
「ソーデスネ、沖縄ノ、アチコカラ、毎年タクサン、イラッシャルケド、戦争デ、家系図モミンナ失クシテシマッテ、ソレニ、家ヲ継イデキタ人達ハ興味ガナカッタセイデ、モー、何モ、分カラナインデスヨ。前ニモ、琉大ノ教授ガ来テ、尋イテイタケド、答エナカッタミタイデスヨ」
　我義理ぬ大兄（うふやっちい）んやるうぬ門中ぬ代表や、我にんかい、
「ナチジンぬハラ（腹）からぬ分かりんでぃぬ話ん聞ちゃる覚いぬあひが、しかっとお、分からんさあ」
　うぬ後、タマグシクぬ拝み所んかい、行ちゃびたん。くまあ又、家系図んちゃんとぅそおる家なてぃ、家主とぅぬ話んはねえちゃびたん。当たい前ぬ事、話や、むるうちなあぐちなかい。
「くまあ、今参（いまめえ）やひが、今先行じゃるナカグシクとぅウラシイとぅお、じるが先が世成とおいびいらあ、なあ、分からん成とおいびいっさあ。うんじゅなあ達や、分かいみそうらんな」
「知らなあ、うりえ。誰がら、今ぬうちなかい、くめえきてぃ、調びらんでえ、成らん筈やいびいしがやあ」
　家んかい戻てぃから、家系図、ゆう調びてぃ、見ちゃれえ、ナチジンぬハラからぬ分かりんでぃ言るヒントから、ある一人ぬ祖先（ウヤフジ）ぬ名が、とうめえらりやびいしが、なあふぃんしかっとぅ、調びてぃから、話出じゃせえやあんでぃ思いとおいびいん。
＊今参（いまめえ）＝比較的新さる事項。たとぅい、何十年、何百年古さる話（事項）やてぃん、うりやかん古さる話とぅぬ比較ないねえ、「今参」やいびいん。
＊先が世（さちがゆう）＝比較的古さる事項。「今参」ぬ反対

マイトガイとぅマイクス　　　＜２００２年７月２０日＞

　中学校ぬばす、小林旭んでえ、赤木佳一郎んでえぬ映画、ゆう見いが行じゃる想（うび）いぬあいびいん。
　うにいぬ日活ぬ男優達や、「マイトガイ」んでぃ言やってぃ、男ん達ぬ「憧り」やいびいたん。うにいぬ二才達や、「マイトガイ」ぬ髪油ぬなしい様から、歩っちい様ん、手様足様ん、諸、ねえびし歩ちゃびいたるむんやいびいん。やしが又、諸、「マイトガイ」んでぃ言ちゃい聞ちゃいしいねえ、必じ、諸、生面笑え小さびいたん。何がんでえ、「マイトガイ」や、沖縄語しえ、「ちびとぅがい（尻尖い）」ぬ意味やたくとぅやいびいん。「マイ」が「尻」ぬ意味やんでえ、『沖縄語辞典』（国立国語研究所）んかいや載てえ無えやびらんしが、『石川市いふぁくとぅば』（伊波信光）んじえ、「直腸の末端」でぃち、名解説さっとおいびいん。また、「マイヌ　キン　イジュカサン（尻の毛も動かさない）」でえ、「全然驚かない」ぬ意味やいびいんでぃぬ事。
　与那城・勝連まんぐらぬ、うぬ言葉ぬ使え様ん負きてえ居いびらん。「まいくす」んでぃ言いねえ、「まい（尻）」とぅ「くす（糞）」ぬ複合語どぅやいびいしが、意味ぬうち変わてぃ（転じて）、「んば」「べえる（嫌だ）」やかん強さる「断固拒否」ぬ意志表示んかい成いびいん。男ぬ女なかい「べえる」んでぃ言やりいねえ、なあだ望みん残とおいびいしが、「まい糞」んでぃ言やりいねえ、男あ、なあ思い切いしえ、ましやいびいんどお。また、「糞まい」んでえ、人うせえ物言いないびいくとぅ、うり、使ゆしえ、ゆうしわるないびいる。
＊人うせえ物言い＝人を馬鹿にした言葉

誰が生ち残ゆがー遺伝子ぬ多様性ぬ話　　＜２００２年７月１５日＞

　くねえだ、見ちゃるテレビぬ「健康番組」ぬ話どぅやいびいしが、日本人やかわてぃ、西洋人やか、肥えゆる遺伝子、持っちょおる人ぬ多さぬ、人口ぬ４割ぐれえや、居んでぃぬ事やいびいん。くぬ遺伝子持っちょおる人お、今ぬガチマイ世んじえ、ガチ肥えいし、ガシ（飢饉）世成いねえ、何十日が間、むぬ食まんてぃん、生ちち行ちゆうすんでぃぬ事やいびいん。今ぬ世ぬガチマイ時代ぬ、うぬ番組ぬ出演者達や、うぬ肥満遺伝子え、人、ふり肥えいしみてぃん、なあんあらん、生活習慣病しみゆるむんやんでぃち、はごうさみそうちょおいびいたん。
　やしが、むしか、後々、戦争んでえ成たい、隕石ぬ地球んかい、突ち当たたいし、時代が、ガシ世成いねえ、日本人（モンゴリアン）や、白人やか、生存率ぬ高く成いるばすやいびいん。遺伝子え、何ががましやらあ、分かやびらん。ちゃあ、遺伝子てぃらむんや、色数存てぃ、地球が、また世ぬ中が如何成らわん、適応成いる人ん達が、居しえ、ましやいびいん。くりがる多様性ぬ強みやいびいる。んちゃ、神ガナシや、ゆう考えとおみせえいびいんやあサイ。優秀な遺伝子びけん揃あち、クローン人間造ゆる研究さっとおいびいしが、何がらぬ存てぃ、適応ならん成やあい、むる、ちゅばちなかい、滅びらんでえ済ましいびがやあ。研究者達や、うりかあん、良う考えてぃ呉ぃみそおらんあれえ。
　言葉んでぃ言しん、色数（多様性）存てぃどぅ、ゐいりさいびいる。沖縄や、ましやいびいんやあ。地方ぬかじ、いろんな言葉ぬ存いびてぃ。まあぬ（田舎）言葉ん、むる大切。沖縄ぬ言葉あ、世界一、豊かあ、あいびらんがあら。

�｡女童ぬ「沖縄ぬ語源説」　＜２００２年７月１０日＞

　我が、ゑえかぬ家んかい、ぬばがたるばすぬ話やいびいん。
　小学生ぬ姪子（みいっくぁ）ぬ、我面見じゅしとぅ、まじゅん、我んかい話持っち来ゃあびたん。
「オジサンハ、『沖縄ノゴゲン』ハ、何カネーッテ、イツモ独リ言、言ッテルサーネー」
　我ねえ、まぬく突ち合あち、珍さむん、見（ぬ）うんねえし、うぬ童ぬ面見じゃびたん。
「私、分カッタサーヨー、モー。ンフフ」
「だあ、あんしいねえ、オジサンぬんかいん、習あち取ぅらせえ」
「教エタラ、何カ呉レルネー」
「いいばす、今日や、汝みんかい、小土産、持っち、ちぇえんどお。あね」
　我ねえ、菓子袋、姪子んかい見しやびたん。姪子あ、いしょうささびやあい、
「ジャー、教エテアゲルヨー。見テイテヨ」
　んでぃ言ち、童え、テレビぬ横んかい置ちぇえたるボールペンとぅ、うりかあんかい存たる包装紙取ぅやあい、我面見じゃあ見じゃあ小さがなあ、うぬ包装紙ぬ空ちょおる所んかい、『大和』でぃち書ちゃびたん。
「あね、コレガ、沖縄ノゴゲンサー。分カル？」
　我がとぅまぬうそおし、見ち、姪子あ、ゆくん、可笑さぎさし、目笑え小し、あびい始みやびたん。
「あね、『大』ハ『オーキナ』サー、『和』ハ『ワ』サー。コノフタツデ、『オーキナワ』サー、分カル？」
「あっはあ、『大キー和』、あんしから『オキナワ』ぬ胆合やさやあ。とお、出来とおん出来とおん。ゆかあっちゅ、ゆかあっちゅ。スゴイやっさあ、汝みえ」
「ダケド、コレ、ダジャレダカラヨー、オジサンノ大好キナ。本当ハ『ヤマト』ッテ、読ムッテヨー。オトーサンガ、言ッテイタワケ。何デカネ-」
「やくとぅよう（あんすくとぅよう）やあ」
＊まぬく突ち合あすん＝眉間を寄せる

�･キレイナ沖縄語とぅスハダノ沖縄語　＜２００２年７月５日＞

　くぬえだ、うちなあぐち会話練習用ぬ『小噺』ぬコピー、持っちょおたるある内地女ぬ我にんかい問ういみせえたん。うぬっちょお、今までぃ、ヤマトゥウチナアグチがやら、ウチナアヤマトゥグチがやら、分かやびらんしが、沖縄ぬ友小から習とおたんでぃぬ事やいびいしが、うりが、じゅんにぬ、うちなあぐちえ、あらん事ぬ分かてぃ、にりくさりとおたる風儀やみせえたん。
「コレガ、ホントウノ、キレイナ、うちなあぐちデスヨネ」
　我ねえ、いふぇえ、考えてぃから、いれえやびたん。
「やいびいさやあ、あんしいねえ、化粧シテイル人ト、シテナイ人トデハ、ドッチガキレデショーカ」
　あんされえ、うぬ女お、「エー」んでぃち、いっとぅちゃあ、面わじゃまちから、直ぐ、笑え顔なみそうち、
「アー、ジャー、コレハ、素肌ノうちなあぐちッテワケデスネ。タトエガ面白イ」
「いい、あんどぅやいびいんどう。マー、ソーユー事デスカネ」
「デモ、オ化粧シテイル、うちなあぐちッテ、アルンデスカ。私ガ今マデ習ッテイタノガ、ソーデスカネ」
「あいびらん、琉歌ハ聴イテ読ンデ心地良イデスヨネ。化粧シテイルカラ、キレイナンデス。組踊ハ、大和オシロイヲ一杯ツケテ、厚化粧シスギテ、素顔ガ分カラナクナッテイルノデスヨ。ツマリ、アノ頃ノうちなあぐちガ、ドーユーモノダッタノカ、化粧ノ下ニ、隠サレテシマッテ、ヨク分カラナインデスヨネ」

◆じゅんにぬ沖縄地名がる観光資源（沖縄ぬ宝）　＜２００２年６月２8日＞　　

　昨日、「うちなぁぐち学校ピリンパラン」うとおてぃ、習てぃちゃるむんやいびいしが、知念村海野や、じゅんねえ、「ヌックヮサ（野津加佐）」んでぃ、言やびいんでぃぬ事。
　うちなあぬじゅんにぬ地名や、分かいねえ分かゆるしゃく、じゅんに、かわてぃ、ゐいりきむんやいびいん。
　やしが、いいくる、いちゃっさきいぬ地名が、いりかまあん漢字ぬ当てぃらりやびてぃ、元ぬ意味ぬ分からんなとおいびいん。あんし又、元々関係無えらんたる筈やる当て字（漢字）が、うぬままあ、大和読み、けえさったる事なかい、ゆくん、元ぬ地名ぬ由来ぬ分からんなとおびいん。
　元ぬ地名が、今ちきてぃ、使あっとおるむんどぅんやれえ、内地から、いめんせえびいる観光客ん達ん、ひるまささしみそうち、でえじな、いしょうさみせえたる筈やいびいん。今頃お、うぬゆうな昔地名ぬ、観光キャンペーンんでえんじ、使あっらてぃ、てえげえ観光資源（沖縄ぬ宝）とぅなとおたる筈やいびいしが、いちゃんだん、捨てぃてぃ、モッタイナイやいびいん。うちなあんちょお、あんすかまでぃん、大和風儀成い欲しゃみせえびいがやあ。
　琉歌・組踊ねえそおる「ハイカラ部分（枝葉）」や残ち、うちなあぐち、うちなあ風儀ぬ地名んでえぬ土着的なむぬ（文化ぬ根本）お、そうまりい、蓋しんそおち、「アカヌケ小（大和風儀）」さんでぃち、うみはまてぃ、うりがる沖縄人ぬ根性やいびいがやあ。沖縄ん人お、口せえ「沖縄文化大切にさびら」んでぃ言しとお、あたらな、胆お何が考えとおらあ、むさっとぅ分かやびらん。今からやてぃん、うちなあ地名ぬ戻さりいるむんやれえ、戻すせえましやいびいしが…。うりかあや、アイヌ地名残ちょおる北海道なかい、じょおい、負きとおいびいっさあ。

�､なあ、夏！　　　＜今ぬまどお、そうユウナグシクムニイなかい＞＜2002年６月２６日＞

　くぬ前までえ、小満芒種んかい、けえ成てぃんでぃぬ話どぅほおたひが、何時ぬみいがやら、ちゅうちゃん、サイサイぬ鳴ち始みてぃ、なあ、じゅんにぬ夏なとおいぎさん。サイサイや、たしか、夏休みまんぐらんじどぅ、鳴ちょおたる覚いぬあひが、今あ、小満芒種からあ、ちゃあ鳴ちいひ、ひるまはなぬならん。
　近頃お、節柄ぬうち変わいがわいふひん、早くなてぃ、何んちが、あひ、慌てぃはあてぃい、ほおらあんでぃ思いん。いがろうが、童ぬばすお、なあひん、よんなあよんなあ、ほおたんねえほおたひが、う神ガナシん、いへえ、違ってぃっちぇえねえらに。まさかぐとぅ、かにえ、外でぃてえ無えんはに思いひが、何やらわん、う神事やれえ、仕方んないみ。
　やひが、サッカーぬワールドカップ見ちゃんなあ？。我のお、サッカーんでえ、ただぬ鞠（まあい）小蹴っ飛ばせえがやらんでぃ思てぃ、うせえてぃ、まるひいじいや、野球んかいどぅ趣味持っちょおひが、今ぬまあどお、あったサッカーファンけえ成てぃ、いいくる見ちょおたんヨ。ちびらあはたんやあ。あぬうとぅるは、はっとおたるフーリガンぬん、来いはんがあたら、何事ん無えらんたんやあ。
註：ユナグシク・カッチンムニーや、動詞・形容詞んでえぬ「さ行」が、いいくる「は行」んかい、変わやびいしが《『ひいさん、悪っさん』んでえぬ例外んあいびいんどお》、分かいみせえびいがやあさい。だあへえ、丁寧語使いねえ、てえげえや、ナファムニーとぅ似ちょおるうないびいくとぅ、うったてぃ、タメ口そおいびいん。くねえてぃ呉ぃんそおり。