うちなあぐち散文会
          
作品集17
  トップページへ戻る
  散文会作品一覧へ戻る
    アズマ セイコウ (東京)
 平成
2110


世の中ぬ変わいよう

世の中や うみちとぅ変わとういびいんやあサイ

 実や、くにぇだ沖縄から 知っちょうるうが参んそうち昔話さびたん うんちゅが話ぬ中んかい 昔ぬ沖縄や あまにん くまにん田っぶっくぁぬ沢山有たしが今や米作いる人や居らんなてぃ田や見いらん成とうんでぃ言いみしぇたん うり聞ち んちゃなあ此りぇ一大事な事なとうんやあんでぃ言ち 話さびたんようサイ ようんなあ考えてぃ見んじるんしぇ此処東京やてぃん田畑からマンションとぅかアパート うりから駐車場んかい うち変わとういびいんどう 人口や たった少らくなとうんでぃぬ事やしが あまくまんかいや高層マンション、一戸建て住宅ぬポコポコ建っちょういびいん ひるまさぬ ないびらんさあ 沖縄ん ゆぬぐとぅ田畑埋みてぃ家ぬ建っちょんでぃぬ事 働ち口ぬまんでぃがうら 手間取ってぃ米、野菜や買うてぃる うさがいみしぇがやあ 今から後 困らんがやあサイ 私達が小さる時分や 美味さ物んや無えんたしが自分達し芋作たい、野菜作たい、米ん作てぃ 食み物に不自由や無えらんたる筈やいびいしが うりから山んかい行きぇ、ムム小、バンシルー、 ゲーマ、 タカチャー、 フーター、クービー、イチュビ、クニブ、なあひん噛まりいしぇ沢山有いびいたしがやあサイ 今ヤンバルぬ山や無えらんなてぃ住宅街なとうんでぃぬ事 くままでぃ世ぬ中ぬ変わてぃ私達やユガフーやいびいがやあ 我んや地畑や無えびらん 今ちきてぃ働かんりぇ家内や守らりやびらん 買うてぃ生活しみしぇる人達 いっぴぇ うりぇまさいびいんサイ やしが少うてぇん小やてぃん地畑ぬ残とうらあ うぬまま置ちょうちゅしどぅ ましやいびいんどうサイ あたいぐぁ うてぃぬ野菜作い 必なあじ為に成いる時が来ゃあびいんどう ちゅけんコンクリート張てぃから また畑んかいや戻やびらん 今ぬ世ぬ中、海やてぃん自由に魚や取ららん 居らんどぅあくとぅ 昔や あまんじん くまんじん ヒートゥドーイし 魚ん沢山取らりいたる筈やあサイ くにぇだテレビ見んちょうたくとぅ 猪が山から下りてぃ来ゃい 作る物作い むる噛みちらかち じゃあふぇ なとうんでぃぬ事やいびいたん 猪びきぇや あいびらん 鹿とぅか猿までぃ 山かいや食むる物ぬ無えん成とうる ちむええ やいびいんやあ くぬ世の中 宇宙んかい転居さびいがやあ 恐ろしむん なとういびいしが

    ゆぬなか かわりば    いきざまん かわてぃ

    かわてぃや くぃるなよ    なさき ぐぐる

 平成21年 10月   アズマ セイコウ