うちなあぐち散文会
          
作品集16
  トップページへ戻る
  散文会作品一覧へ戻る
読者投稿    ナカンダカリ (茨城)
 平成
21


 近況報告                    漢字混んちゃあ見(ん)じゅん

 はいさい!

 いいしょうぐぁち しんそーちゃびたがやーでぃち、うむとーいびーん、しょうぐぁち(シンヌいちぐぁち にじゅうるくにち)めーに てぃがみ かかねーならんでぃち うむとーたしが すぐとぅぬいちなさぬ かちーさん なままでぃ うくりてぃ ぐぶりーなとーいびーしが、ゆるち とぅらしんそーりよーでぃち うむとーいびーん。

なぁ ちぬうからーはる(立春)なとうしが やまとぅwuてぇーなーだ はろーあらん、でーじな ひーさぬ ふゆるやしが、ベランダぬプランターんかい いいてーる んみ(梅)ぬきーかいや にしゅうかんぐれーめーから はなさちょーん はーや むるうてぃてぃ ねーらんなてぃ かりきーぬ ぐとーしが しるはなぐゎびけーん さちょーん プランターんかいや ふかぬ きーん いいらっとーしが、なまぬとぅくまーはなさちょーせーうぬんみとぅ たまとーとぅ いちごびけーんどぅやいびーる。くんどぅぬ たまとーや みじらしいむんやいびーさ、なままでぃぬ たまとーや ひーくないねーむるかりとーたくとぅ くんどぅぬ くぬたまとーん ひーくないねーかりーん やーでぃち うむとーたしが、かりらんしなけーいに はなんさかちぃ みーまでぃなとーん うぬたまとーや ふゆなてぃん ひーくなてぃん かりらんたまとーやらはじでぃち うむとーいびーん。

また イチゴや ひーくなてぃん、かりらんしが ひーさぬたみるやらはじでぃち うむとーしが なままでーはなーさちん みーやならんたしが、ちぬうからー はるなとーくとぅ みーん ないがすらわからんでぃち うむとーいびーん。

プランターんかい いいてーる くんぶんかいや くんどーななち みーがなとーたしが くんどー スーサーんかい みーちぇーかまとーたん すーさーでぃーせーみじらしいむんやいびーんどー、くんぶがきいるーなてぃん すごーかまんたくとぅ スーサーや くんぼーかまんさやーでぃちうむとーたしが あねーあらん さんしゅうかんびけーんめーやたしが たーちみーちぇー スーサーんかい かまっとーたくとぅ なーだかまらんせーどぅーなーしとぅてぃかだしが なーてぃーちぇー ぬくとーいびーん なまぬくとーせー ふつうぬくんぼーあらん なちくんぶでぃーしやしが なーだ スーサーんかまんねーやしが、なーかまりーやーでぃち ちゃーし スーサーやわかいがやーでぃち うむとーいびーん、みーし んんちぇーわからんはじやしが、くんぶぬかざしるわかいがやーでぃち うむとーしが、わんねー スーサーぬせんものーあらんくとぅわからん。すーさーや ふゆなてぃ かむしが ねーらんなとーくとぅ くれーくぇーぬくちぇーさやーでぃちうむとーたる くんぶぬ かーまでぃん かみーが ちゃーに にさんにちさーに ぬくとーるかーん むるかでーたん。なーくんぶぬかーまでぃんかでぃ なま かまでぃーせー なちくんぶ てぃーちる ぬくとーる、たまとーん かまでぃーやすしが なーだ あかーなてーねんくとぅ かまらん、あんしが、スーサーや めーにち ベランダんかい かまでぃーせ ねーんがやーでぃち かめーいが ちゅーんどーさい。

またプランターんかいや カリンでぃーしん いいてーしが、うぬきーんかいや みーが てぃーちなとーいびーたしが うぬみーやちゃーし かむが でぃーしが わからんくとぅ うぬままうっちぇーたくとぅ うぬみーやなんくるうてぃとーたくとぅ ちゃーがなーし かまらんがやーでぃち うむてぃ「広辞苑」んんちゃくとぅ カリンでぃーせーうぬままーかまらんでぃーせー かかっとーしが、ちゃーしかむが でぃーせー かかってーねーらん、だーあんせ「百科事典」んんちんだでぃち くんどー 「百科辞典」んちゃくとー、カリンでぃーせーうぬままーかまらんくとぅ、さーたーんかい ちきたい さきんかい ちきたいすしが、ちゅうごくwuてーにしんにんめーから くすいんかい ちかとーたん でぃちかかっとーたくとぅ はちみつこーてぃちゃーに くるざーたーいってぃ カリンでぃーし ちきてぇーしが かまでぃーがすらわからん。

くねーだーでーじなひーさたしが、あさぬ るくじぐれーやたしが、ルート6号ぬ千代田、石岡インターぬ2キロメーターぐれーめーんかい みちぬすばんかい なまーなんどやんどーでぃち わかいぬぐとぅなとーしが たっちょーしが、うりんかいやマイナス7どでぃち んじとーたん、つぎぬひーやマイナス3どやたしが、あんしひーさてぃん ふくたーむしでぃーせー しなんくとぅ みじらしいむんやいびーさ、うぬぐくたーむしぬふくたーや でーじな ちから むっちょーんねーやいびいさ、みじまでぃん こおり ないるひーさやくとぅ うぬふくたーが ねーらんねー、ちゃっさ ふくたーむしやてぃん いちからんでぃち うむとーいびーん、ふくたーむしぬなかー ただぬきーぬふぁーたっくゎちぇーるうっぺあらん、わったーが なま ひーさいに ちちょーる ちんぬーなかんかいや わたぎーがちちょうしが うぬちんふーじーなてーねーねーんがやーでぃち うむとーいびーん、なまやてぃん うぬふくたーむせー ちゃーにんぜーあらん くねーだん、あっちゃーちょたくとぅ、おんどがあがいねー あちゃーすんねーやいびーしが、なぁーつちちしーねー んずちはじまらんがやーでぃち うむとーいびーん。

あそうそうりだいじんりーせー かんぜーゆみーさんくとぅ くんどん スイスぬダボスwuてぃ かんじゆみまちげーそーたんりーぬはなしーやしが、わんにん ゆう まちがとーびーしが、わかむんぬゆみまちげーすしとぅ あそうそうりだいじんぬまちげーゆみとーゆぬむのーあらんでぃち うむとーいびーしが、ちゃーやいびーがや? しばいぬなかwuてぃ かかとーる かんじぬ「場」でぃーし「じょう」でぃち ゆむぬ ちゅんちゃーがwu―たくとぅ、わんねーなままでぃ まちげーゆみーどぅ そーたがやーでぃち うむてぃ たいみっちゃいぬ るしんちゃーんかい、げきぬなかwuてーなんまく なんば あらん、なまぬちゅんちゃーや なんまく なんじょう でぃちるいちゃいゆだいすがやーでぃち でんわかきてぃ ちちゃしが、なんまく なんじょう でぃちぇーいちゃいゆだいやさんでぃーぬ くとぅ やいびーたん。わんにん だいがくいちにんぬ とぅち やたらはじやしが、おおさかぬ せんりがおかがくせいりょうでぃーぬ うちなーぬ がくせいりょうんかいwu−たるとぅちやたしが、しんぶんかい かかっとーる逮捕でぃーぬ字 まちげーゆみーさーに すばんかいwu―たるしかい のーさったん、また ちゅけーのー ドイツからけーてぃちから ちばぬならしのぬがくせいりょうんかい また いっちょーたしが うまwuてぃん 蜷川でぃーぬ字 まちげーゆみーさーに うりんまた すばんかいwu−たるるしんかい のーさったん。またちゅけーのー だいがくいんぬとぅちやたしが うれーぬーでぃーぬ字―がやたら わしりとーしが、うぬとぅちぇー しんしーん がくせいーん のーさんたしが あとぅから るーさに しらびてぃ あれーまちげーやてーさでぃちわかたしが、わんにん なまやてぃん まちげーゆみ、まちげーうびーそーいびーたん。ジーメンスでぃーぬくゎいしゃwuてぃアルバイトそうたるとぅちぬくとぅやいびーしが、きんようびに すぐとぅうわてぃ やーかいけーいぬとぅちねー んんな「シェーネス ヴォッヒェンエンデ」でぃち あいさつすしが、シェーネスでぃーせー まちがとーん、「シェーネス」やあらん、「シェーネ」でぃち いゃねーならん、ぬーでぃちシェーネでぃち いゃねーならんがでぃーね ヴォッヒェンエンデぬエンデでぃーせ ヰなぐやくとぅ めーぬシェーんでぃーぬ「けいようし」んかいや エンデでぃーせー  ヰなぐぬやんどーでぃちヰなぐぬしるしちきらねーならんしが、うぬヰなぐぬしるせー「e」やくとぅ シェーンぬあとぅんかい「e」ちきーねー 「シェーネス」やあらん、「シェーネ」でぃちる ないくとぅドイツ人のードイツ語まちがとーんでぃち うむとーたしが やーかいけーてぃ 辞典んんちゃくとーエンデでぃーせーヰなごーあらん、ヰきがんあらん ちゅうせいでぃちかかっとーたん、わんねえードイツんかいいつるめーに ドイツ語ならとーたしが うぬとぅちに いちばんあとぅぬ字−が「e」やせーむる ヰなぐでぃち まちげーうびーそーたくとぅドイツ人ぬドイツ語まちがてぃちかとーんでぃち うむとーたん、くぬ「シェーネス ヴォッヒェンエンデ」でぃーせーいい ヰヰどよう にちよう なれーやーでぃち にがとーいびーん でーぬ いみ やいびーん。

わんにん なまやてぃん まちげーたい、まちげーゆみ びけーんどぅ そーいびーくとぅ ふかぬちゅぬくとー ありがまちがとーん くりがまちがとーん でぃちぇーいゃらんしが、るーぬくとー すばんかい うっち、わんがかんげーてぃん、あそうそうりぬ まちげーゆみでぃーせーふつうぬまちげーゆめーあらんねーやいびーしが、ちゃーやいびーがやー? 見地、基盤でぃーせーまちがらんはじやしがやーでぃち うむとーいびーん。んんかしぬそうりだいじんぬ吉田茂ぬ んまがやんでぃーぬくとぅ、たったうぬくとぅびけーんし そうりだいじんなとーんりーぬくとぅやしが、ちゅぶるぬわっさぬたみがやらわからんしが、わったーちゅぶるさーねーちゃっさかんがーてぃん かんげーららん。また あそうそうりだいじんや まんがびけーん ゆむくとぅどぅ かんぜーゆみーさんでぃち いゃっとーるぐとーしが、見地、基盤でぃーしん ゆみーさんくとぅ まんがやてぃん ゆみーさんでぃち うむいしが、ちゃーやいびーがやー? わんにん青木雄二でぃーぬ ちゅが かちぇーる「ナニワ金融道」でぃーぬマンガむちょーしが、ふつうぬちゅんちゃーや うぬマンガや、金融界ぬうらばなしーる やんどーでぃち いちょーるぐとーしが、うりかちぇーるちゅが いいせーうりとーちがとーいびーん、うぬちゅが いいせーちゃぬふーじなとーいびーいが でぃーねーうぬマンガーただゆでぃん ふんとーぬ いめーわからん、うぬマンガぬ ふんとーぬ いみわかいぬたみねー「マルクス」とぅ「ドフトエフスキー」わからねー ならんでぃち いちょーいびーん。やくとぅ あそうそうりぬちからからしーねー、マンガやてぃん むろーゆみーさんでぃちうむとーしが ちゃーやいびーがやー? あそうたろうでぃーぬ 吉田茂ぬ んまがんかい そうりだいじんなりよう でぃち ふだ いってーる ちゅんちゃーん もんだいやしが、いちばんぬもんだいや ほんにんやいびーさ、わんねーせんものーあらんくとぅ、わからんしが、あそうたろうでぃーぬそうりだいじのー ちゃーんならん とぅくま までぃ ちょーんねーやいびーん、いちばん ましやせー めーぬ たいぬそーりだいじん、あべ とぅ ふくだが やみたぐとぅし どぅーさーに やみーしやしが、あそうたろうでぃーせーどぅーさねーやみらんふーじーやいびーくとぅ どぅーさーにやみらんねー んーなさーに やみらすせー ましやいびーさ。めーぬあべりーしん るーかってぃーそうりだいじんやたんやー あれーそうりだいじんないるめーねー こいずみそうりぬくしんかい たっくゎてぃ そうりだいじんでぃーせー やすくにじんじゃんかい こうしきさんぱい さねーならんでぃち うふむにーそうたしが どぅーがそうりだいじんなたくとぅ やすくにじんじゃんかいや いかん すぐちゅうごくんかい んじょうたん。そうりだいじんやてぃん にんきびけーんせーならんでぃちうむとーいびーしが ちゃーやいびーがやー?

くねーだまでぃ ユダヤ人や パレスチナぬガザんかい ばくだんうとぅち1300人あまい くるさっとーんでぃぬはなしーやしが ユダヤ人がガザんかいばくだんうとぅすしん、ユダヤ人(じ)のーパレスチナぬハマスがイスラエルんかいミサイルさーに ばくだんうちくむくとぅ うぬたみにるーぬとぅくま まむいぬたみにガザんかい ばくだんうとぅちょーん やくとぅ わっさせーイスラエルやあらん ハマスるやるでぃち いちょーいびーしが、もんだいや ぬーでぃち ハマスやイスラエルんかいミサイルうっちょーがでぃーぬ くとーあらんがやーでぃちうむとーいびーん。ユダヤ人(じ)のーユダヤ人びけーんせーいくさーならん、アメリカが くしんかい wu−くとぅる ないんでぃーぬくとぅ やいびーん、ぬーんでぃちアメリカーユダヤ人 かしーすが でぃーね ユダヤ人かしーしーねーせんきょwuてぃ ちからないしが パレスチナ(アラブ)じんかしーしん せんきょwuてーちからーならんでぃち いゃっとーんねーやいびーしが ちゃーやいびーがや? うりがふんとーるとぅくるやてぃーん わんがユダヤ人やいねー うぬふーじーかんげーかたーとぅらんしがやーでぃち うむとーいびーん ユダヤ人のー あまwuてぃパレスチナ人とまじょうん いちち いつるたみねー ばくだんうとぅちゃい、ガザからかんたんに んじららんぐとぅし んんかしぬベルリンぬかびとゆぬむん、ありやかんかんじゅうぬかびつくてぃ なまや ガザーいちばんまぎーかんごく でぃち いゃっとーしが、あんねーるかびさーに かんごくつくいせーまちがとーん、まじ いちばんぬまちげーや、ユダヤ人がしんじとーるユダヤきょうぬ ほんかい、パレスチナやユダヤ人ぬ むんやんどーでぃち かかとーくとぅ パレスチナやユダヤ人ぬむんやんでぃち しんじとーるくとーあらんがやーでぃち うむとーびーん、うぬユダヤ人がしんじとーんでぃーぬ ほんや たーがかちぇーがでぃーしが もんだいやいびーん。ユダヤ人やユダヤ人がユダヤ人ぬんかい、うぬとぅち うぬじーや、いったーむんやさでぃち ユダヤ人ぬカミがユダヤ人ぬんかい ヰヰらちゃんでぃちょうしが、うぬとぅち うぬじーでぃーせー たーんwu−らんとぅくまーあらん、んまんかいやユダヤ人がちゅーるめーから ふかぬちゅんちゃーが wu−たるとぅち じーるやいびーる、かんたんに いいねー うちなーんかい やまとぅんちゅーが ちゃーに くまー やまとぅんちゅうぬカミが やまとぅんちゅうんかい ヰヰらちぇーるとぅちやくとぅ うちなーや うちなーんちゅぬむのーあらん やまとぅんちゅーぬむんやさんでぃち いちょーしとぅ ゆむむんやさでぃち うむとーいびーん、ユダヤ人や、ユダヤ人ぬカミがわったーんかい ヰヰらちぇーるとぅちやくとぅ やくしくぬとぅちでぃち いちょーしが、ユダヤ人(じ)のーユダヤ人ぬカミでぃーしが、カミでぃーせー まーぬカミやてぃん カミが んまぬちゅやかーんめーに んまんかいうーたんでぃせーかんがえーららん、カミが ちゅ ちゅくいんでぃーせー かんげーららん カミんでぃーせー まーぬカミやてぃん、んまぬちゅんちゃーが ちゅくてーるカミどぅやいーびーる、ユダヤ人ぬカミんでぃーしん ユダヤ人が ちゅくてーる カミどぅやいびーくとぅ まーまでぃん ユダヤ人ぬたみぬカミどぅやいびーくとぅ ユダヤ人が んまぬとぅちぇーましやっさーでぃち うむとーたくとぅ んまんかいや ふかぬちゅんちゃーがwu−たしが、うまぬとぅちぇーユダヤ人ぬむんやさ でぃち ユダヤ人ぬカミが ユダヤ人(じ)ぬかい いいたんでぃち いちょーいびーん、やまとぅんちゅーん ユダヤ人ふーじ やいびーんどー やまとぅんちゅーや ほっかいどーや んんかしから やまとぅぬむんやたんでぃち いちょーいびーんどー やくとぅ わんねーやまとぅんちゅーや うちなーん んんかしから やまとぅぬむんやたんでぃち やがてぃ やまとぅんちゅーが いいはじみらんがやーでぃち なまから しわそーいびーしが、うぬじゅなーや ちゃぬふーじ かんげーやいびーやがやー? にせんえんさつんかい「しゅれいのもん」がかかっとーしが、うれーうちなーや うちなーんちゅぬむのーあらん やまとぅんちゅうーぬむんどぅやんどーでぃち せかいじゅうんかい んんかてぃいちょーるしるし、しょうこやいびーん、うりびけーのーあらん、「琉球処分」でぃーせーまちがてーねーらんでぃち いちょーいびーんどー、やまとぅちゅーや アメリカーなまぬとぅくまー くぬゆぬなかwuてぃ いちばんちゅうさくとぅ でぃち アメリカんかい たっくゎとーしが アメリカがいちばんでぃーしん いちまでぃがやら わからん、広辞苑 んんじーねー 「沙羅双樹の花の色、盛者(じょうじゃ)必衰の理をあらわす」でぃちかかっとーいびーん、うれー平家物語―ゆまんてぃん またゴータマがいちゃんでぃち いゃっとーる諸行無常でぃーせーわからんてぃん ローマ帝国がちゃーなたがんでぃーしん んんじーねー ゆーわかやびーん、んかしぬゲルマン人でぃーせー ローマ帝国からしーねー野蛮人でぃちかんがえーらっとーたんねーやいびーん。アメリカがいちばんでぃーせー いちまでぃがやら わからんくとぅ ユダヤ人(じ)のー パレスチナ人とぅ おうらんせーませーあらんがやーでぃち うむとーいびーん、くねーだテレビんんちょーたしが、ついぬパレスチナ人ぬはなしーちちゃしが、イスラエルでぃーぬ ユダヤ人ぬくにがつくらりーるめーや パレスチナじぬん ユダヤじぬん ちゅけーとぅないwuてぃ くらち、たげーに しょうたいさい、またしょうたいさったい さーにおーえーん さんぐとぅし くらちょーたんでぃーぬくとぅやたしが、あんあらんねーユダヤじのーいちちぇーいからんりち かんげーとーいびーん。ユダヤ人があまwuてぃ いちち いちゅぬたみねー パレスチナ人、アラブ人とぅおーてーならん、なまーアメリカが くしんかい たっちょーくとぅガザぬ ちゅんちゃーが自由に んじららんぐとぅし くるしみとーしが、アメリカがよーくなてぃんじ じぬんねーらんなてぃ かしーしーさんないねー ちゃーないがやーでぃーぬ くとぅ かんげーいね ユダヤ人が ちゃっさ ふりむんやてぃん うぬあたいや わかいるはじやしがやーでぃち うむとーびーしが ちゃーやいびーがやー?

わんねーげつようびや がっこうかいいかんしーが くんどぅぬしょぐゎちぇーしんぬいちぐゎち にじゅうるくにちぬ げつようびんかい あたとーたくとぅ やしみやたしが、ふちか、みっかーやしめーあらんたくとぅ いいしょうぐゎち でぃちぇ いゃらんでぃち うむとーいびーん。やまとぅんちゅうが んんかしぬしょうぐゎち、うちなーしょうぐゎち アジアぬしょうぐゎちんかいのーさねーちゃーんならんさやー でぃち うむとーいびーん。やまとぅwuてーちゃーん ならんしが、ぬーでぃち うちなーwuてぃん やまとぅんちゅーぬねーびさねーならんがでぃち うむとーびーん。うちなーwuてー うちなーしょうぐゎち、アジアぬしょうぐゎち すせーましやさでぃち うむとーいびーん。

2009にん しょうぐゎちぬじゅういちにち(シンヌにんぐゎちぬいちか)

なかんだかり てつまさ

 

 



漢字混じり表記(うゎあばぐとぅんでえ思いんすしが、読まあが、受き取いやっさんねえ、漢字まんきてぃ書ちぇえいびいん)

 

はいさい!

良い正月 しんそーちゃびたがやーでぃち、思とーいびーん。正月(新ヌ一月二十六日)前に 手紙書かねーならんでぃち、思とーたしが、仕事ぬ忙なさぬ 書ちーさん。今迄 遅りてぃ、無礼ー成とーいびーしが、許ち取らしんそーりよーでぃち、思とーいびーん。

なぁ、昨日からー、はる(立春)成とうしが、やまとぅwuてぇー未だ、春ーあらん、でーじな、寒ーさぬ 冬るやしが、ベランダぬプランターんかい植いてーる梅ぬ木ーかいや、二週間ぐれー前から 花咲ちょーん。葉や、諸落てぃてぃ、無ーらんなてぃ、枯り木ーぬ如ーしが、白花ぐゎびけーん、咲ちょーん。プランターんかいや、他ぬ木ん、植いらっとーしが、今ぬとぅくまー花咲ちょーせー、うぬ梅とぅ、たまとーとぅ 苺びけーんどぅやいびーる。今度ぬ たまとーや、珍しいむんやいびーさ。今迄ぬ たまとーや、寒く成いねー、諸枯りとーたくとぅ、今度ぬ くぬたまとーん、寒く成いねー枯りーんやーでぃち、思とーたしが、枯りらんしなけーいに 花ん咲かちぃ、実迄なとーん。うぬたまとーや、 冬成てぃん、寒く成てぃん、枯りらんたまとーやら筈でぃち、思とーいびーん。

また、イチゴや、寒く成てぃん、枯りらんしが、寒さぬ為るやら筈でぃち、思とーしが、今迄ー、花ー咲ちん、実やならんたしが、昨日からー、春成とーくとぅ、実ん ないがすら分からんでぃち、思とーいびーん。

プランターんかい 植いてーる九年母んかいや 今度ー、七ち 実がなとーたしが、今度ー、スーサーんかい 三ちぇー食まとーたん。スーサーでぃーせー珍しいむんやいびーんどー、九年母が黄色ー、成てぃん、直ごー、食まんたくとぅ、スーサーや、九年母ー、食まんさやーでぃち、思とーたしが、あねーあらん、三週間びけーん前やたしが、二ち三ちぇー、スーサーんかい 食まっとーたくとぅ、未だ食まらんせー、自なーし、取てぃ食だしが、なー一ちぇー、残とーいびーん。今残とーせー、普通ぬ九年母ーあらん、夏九年母でぃーしやしが、未だ、スーサーん 食まんねーやしが、なー、食まりーやーでぃち、如何し、スーサーや、分かいがやーでぃち、思とーいびーん。目し、見ちぇー、分からん筈やしが、九年母ぬ匂しる分かいがやーでぃち、思とーしが、我ねー、スーサーぬ専門ーあらんくとぅ分からん。すーさーや、冬成てぃ、食しが、無ーらんなとーくとぅ、くれー食ぇー残ちぇーさやーでぃち、思とーたる 九年母ぬ 皮迄ん、食みーが、来ゃーに、二、三日さーに、残とーる皮ん 諸食でーたん。なー、九年母ぬ皮迄ん食でぃ、今、食までぃーせー、夏九年母 一ちる 残とーる。たまとーん 食までぃーやすしが、未だ、赤ー成てー、無んくとぅ、食まらん。あんしが、スーサーや、毎日、ベランダんかい 食までぃーせ、無ーんがやーでぃち、かめーいが、来ゅーんどーさい。

また、プランターんかいや、カリンでぃーしん、植いてーしが、うぬ木んかいや、実が、一ちなとーいびーたしが、うぬ実ーや、如何し 食むが、でぃーしが 分からんくとぅ、うぬままう置っちぇーたくとぅ、うぬ実やなんくる、落てぃとーたくとぅ、如何がなーし、食まらんがやーでぃち、思てぃ「広辞苑」見ちゃくとぅ、カリンでぃーせー、うぬままー、食まらんでぃーせー、書かっとーしが、如何し食むが、でぃーせー、書かってー無ーらん、だー、あんせ「百科事典」見ちんだでぃち、今度ー、「百科辞典」見ちゃくとー、カリンでぃーせー、うぬままー食まらんくとぅ、砂糖んかい、漬きたい、酒んかい 漬きたいすしが、中国wuてー、二千年前から 薬んかい 使とーたん でぃち、書かっとーたくとぅ、蜂蜜買てぃ、来ゃーに、黒砂糖淹ってぃ、カリンでぃーし、漬きてぇーしが、食までぃーがすら分からん。

今ね間、大事な、寒ーさたしが、朝ぬ 六時ぐれーやたしが、ルート6号ぬ千代田、石岡インターぬ2キロメーターぐれー前んかい 道ぬ傍んかい 今ー、何度やんどーでぃち、分かいぬ如成とーしが 立っちょーしが、うりんかいやマイナス7度でぃち、出じとーたん。次ぬ日ーや、マイナス3度やたしが、あんし、寒ーさてぃん、ふくたー虫でぃーせー、死なんくとぅ、珍らしいむんやいびーさ。うぬふくたー虫ぬふくたーや、でーじな、力持っちょーんねーやいびいさ。水迄ん 氷成いる寒ーさやくとぅ うぬふくたーが 無ーらんねー、ちゃっさ、ふくたー虫やてぃん 生ちからんでぃち、思とーいびーん。ふくたー虫ぬ中ー、ただぬ木ぬ葉たっ付ゎちぇーるうっぺあらん、我ったーが、今、寒ーさいに、着ちょーる衣ぬー中んかいや、綿毛が付ちょうしが、うぬ衣風儀成てー無ーんがやーでぃち、思とーいびーん、今やてぃん、うぬふくたー虫ー、ちゃー寝んぜーあらん、今ね間ん、歩っちゃーちょたくとぅ、温度が上がいねー、歩っちゃーすんねーやいびーしが、なぁー、一月しーねー、動ち始まらんがやーでぃち、思とーいびーん。

麻生総理大臣りーせー、漢字ー、読みーさん。今度どぅん、スイスぬダボスwuてぃ、漢字読み間違ーそーたんりーぬ話やしが、我にん、良う、間違とーびーしが、若者ぬ読み間違ーすしとぅ、麻生総理大臣ぬ間違―読みとー、同ぬむのーあらんでぃち、思とーいびーしが、如何やいびーがや? 芝居ぬ中wuてぃ、書かとーる漢字ぬ「場」でぃーし、「じょう」でぃち、読むぬ 人んちゃーが居たくとぅ、我ねー今迄、間違ー読みーどぅ そーたがやーでぃち、思てぃ、二人、三人ぬ 友んちゃーんかい、劇ぬ中wuてー、「なんまく、なんば」あらん、今ぬ人んちゃーや、「なんまく、なんじょう」でぃちる 言ちゃい読だいすがやーでぃち、電話かきてぃ、訊ちゃしが、「なんまく、なんじょう」でぃちぇー、言ちゃい読だいやさんでぃーぬ事やいびーたん。我にん 大学一年ぬ時 やたら筈やしが、大阪ぬ 千里が丘学生寮でぃーぬ うちなーぬ 学生寮んかい居たる時やたしが、新聞んかい 書かっとーる逮捕でぃーぬ字、間違ー読みーさーに、傍んかい居たる友かい 直さったん、また 一けーのー ドイツから帰ーてぃちから、千葉ぬ習志野ぬ学生寮んかい また、入っちょーたしが うまwuてぃん、蜷川でぃーぬ字 間違ー読みーさーに、うりんまた、傍んかい居たる友んかい 直さったん。また一けーのー、大学院ぬ時やたしが、うれーぬーでぃーぬ字―がやたら 忘りとーしが、うぬ時ぇー 先生ん 学生ん 直さんたしが、後から 自さに 調びてぃ あれー間違ーやてーさでぃち、分かたしが、我にん、今やてぃん、間違ー読み、間違―覚ーそーいびーたん。ジーメンスでぃーぬ会社wuてぃアルバイトそうたる時ぬ事やいびーしが、金曜日に 仕事終てぃ、家かい帰いぬ時ねー 皆な「シェーネス ヴォッヒェンエンデ」でぃち、挨拶すしが、シェーネスでぃーせー、間違とーん、「シェーネス」やあらん、「シェーネ」でぃち 言ゃねーならん、何でぃち、シェーネでぃち、言ゃねーならんがでぃーね、ヴォッヒェンエンデぬエンデでぃーせ、女やくとぅ、前ぬシェーんでぃーぬ「形容詞」んかいや、エンデでぃーせー、女なぐぬやんどーでぃち、女ぬ印付きらねーならんしが、うぬ女ぬ印ー「e」やくとぅ シェーンぬ後んかい「e」付きーねー、「シェーネス」やあらん、「シェーネ」でぃちる ないくとぅドイツ人のードイツ語間違とーんでぃち、思とーたしが、家かいけーてぃ、辞典見ちゃくとー、エンデでぃーせー女ーあらん、男んあらん、中性でぃち、書かっとーたん。我ねえードイツんかい行つる前に、ドイツ語習とーたしが、うぬ時に、一番後ぬ字−が「e」やせー諸、女でぃち、間違ー覚ーそーたくとぅ、ドイツ人ぬドイツ語、間違てぃ使とーんでぃち、思とーたん。くぬ「シェーネス ヴォッヒェンエンデ」でぃーせー、「良い土曜 日曜 成れーやーでぃち、願とーいびーん」でぃーぬ意味やいびーん。

我にん、今やてぃん、間違ーたい、間違ー読み びけーんどぅ、そーいびーくとぅ、他ぬ人ぬ事ー、ありが間違とーん くりが間違とーん、でぃちぇー、言ゃらんしが、自ーぬ事ー、傍んかい、置っち、我が考えーてぃん、麻生総理ぬ 間違ー読みでぃーせー、普通ぬ間違ー読めーあらんねーやいびーしが、如何やいびーがやー? 「見地」、「基盤」でぃーせー、間違らん筈やしがやーでぃち、思とーいびーん。昔しぬ総理大臣ぬ吉田茂ぬ 孫やんでぃーぬくとぅ。たったうぬ事びけーんし、総理大臣成とーんりーぬ事やしが、頭ぬ悪っさぬ為がやら分からんしが、我ったー頭さーねー、如何、考えーてぃん、考えーららん。また、麻生須折大臣や 漫画びけーん、読むくとぅどぅ、漢字ー読みーさんでぃち、言ゃっとーる如ーしが、「見地」、「基盤」でぃーしん、読みーさんくとぅ、漫画やてぃん、読みーさんでぃち、思いしが、如何やいびーがやー? 我にん青木雄二でぃーぬ人が 書ちぇーる「ナニワ金融道」でぃーぬ漫画持っちょーしが、普通ぬ人んちゃーや、うぬ漫画や、金融界ぬ裏話る やんどーでぃち、言ちょーる如ーしが、うりか書ちぇーる人が、言いせーうりとー違とーいびーん。うぬ人が言いせー、如何ぬ風儀成とーいびーいが、でぃーねーうぬ漫画ーただ読でぃん、本当ぬ意味ー分からん、うぬ漫画ぬ本当ぬ意味分かいぬ為ねー、「マルクス」とぅ「ドフトエフスキー」分からねー、成らんでぃち、言ちょーいびーん。やくとぅ、麻生総理大臣ぬ力からしーねー、漫画やてぃん、諸ー読ゆみーさんでぃち、思とーしが、如何やいびーがやー? 麻生太郎でぃーぬ吉田茂ぬ孫んかい、総理大臣成りよう、でぃち、札 入ってーる人んちゃーん、問題やしが、一番ぬ問題や、本人やいびーさ。我ねー専門ーあらんくとぅ、分からんしが、麻生太郎でぃーぬ総理大臣ー、如何んならん、とぅくま迄、来ょーんねーやいびーん。一番、ましやせー、前ぬ 二人ぬ総理大臣、安陪とぅ福田が辞みたぬ如し、自ーさーに、辞みーしやしが、麻生太郎でぃーせー、自ーさねー辞やみらん風儀やいびーくとぅ、自ーさーねー辞みらんねー、皆さーに、辞みらすせー、ましやいびーさ。前ぬ安陪総理ん、自勝手総理大臣やたんやー。あれー総理大臣成いる前ねー、小泉総理ぬ後んかい、たっくゎてぃ、総理大臣でぃーせー、靖国神社んかい、公式参拝さねー成らんでぃち、大物言ーそうたしが、自が総理大臣成たくとぅ、靖国神社んかいや、行かん、直ぐ、中国んかい 行じょうたん。総理大臣やてぃん、人気びけーんせー成らんでぃち、思とーいびーしが 如何やいびーがやー?

今ね間迄、ユダヤ人や、パレスチナぬガザんかい 爆弾落とぅち、1300人余い、殺さっとーんでぃぬ話やしが、ユダヤ人がガザんかい爆弾落とぅすしん、ユダヤ人(じ)のーパレスチナぬハマスがイスラエルんかいミサイルさーに、爆弾撃ち込むくとぅ、うぬ為に自ぬ所、守いぬ為にガザんかい、爆弾落とぅちょーん、やくとぅ、悪っさせーイスラエルやあらん、ハマスるやるでぃち、言ちょーいびーしが、問題や、何でぃち、ハマスやイスラエルんかいミサイル撃っちょーがでぃーぬ事ーあらんがやーでぃち、思とーいびーん。ユダヤ人(じ)のーユダヤ人びけーんせー、戦ー成らん、アメリカが、後んかい 居くとぅる成いんでぃーぬ事やいびーん。何んでぃち、アメリカー、ユダヤ人、加勢すが でぃーね、ユダヤ人加勢しーねー選挙wuてぃ、力成いしが、パレスチナ(アラブ)人加勢しん 選挙wuてー、力ー成らんでぃち、言ゃっとーんねーやいびーしが、如何やいびーがや? うりが本当ぬ所やてぃーん、我がユダヤ人やいねー、うぬ風儀考ー方ー、取らんしがやーでぃち、思とーいびーん。ユダヤ人のー、あまwuてぃパレスチナ人とまじょうん 生ちち 行つる為ねー、爆弾落とぅちゃい、ガザから簡単に 出ららん如し、昔ぬベルリンぬ壁と同ぬむん、ありやかん頑丈ぬか壁造てぃ、今や、ガザー一番、大ぎー監獄でぃち、言ゃっとーしが、あんねーる壁さーに、監獄造いせー、間違とーん。先じ、一番ぬ間違ーや、ユダヤ人が信じとーるユダヤ教ぬ本かい、パレスチナやユダヤ人ぬ物やんどーでぃち、 書かとーくとぅ、パレスチナやユダヤ人ぬ物やんでぃち、信じとーる事ーあらんがやーでぃち、思とーびーん。うぬユダヤ人が信じとーんでぃーぬ本や、誰が書ちぇーがでぃーしが、問題やいびーん。ユダヤ人やユダヤ人がユダヤ人ぬんかい、うぬ時、うぬ地や、いったー物やさでぃち、ユダヤ人ぬ神がユダヤ人ぬんかい、得らちゃんでぃちょうしが、うぬ時、うぬ地でぃーせー誰ん居らん所ーあらん、んまんかいやユダヤ人が来ゅーる前から、他ぬ人んちゃーが居たる土地、地るやいびーる。簡単に 言いねー うちなーんかい、やまとぅん人が 来ゃーに、くまー、やまとぅん人ぬ神が やまとぅん人んかい 得らちぇーる土地やくとぅ、うちなーや うちなーん人ぬ物ーあらん、やまとぅん人ぬ物やさんでぃち、 言ちょーしとぅ、同む物やさでぃち、思とーいびーん。ユダヤ人や、ユダヤ人ぬ神が我ったーんかい、得らちぇーる土地やくとぅ、約束ぬ土地でぃち、言ちょーしが、ユダヤ人(じ)のーユダヤ人ぬ神でぃーしが、カミでぃーせー、まーぬ神やてぃん、神が んまぬ人やかーん前に んまんかい居ーたんでぃせー、考えーららん。神が 人 創いんでぃーせー、考えーららん。神んでぃーせー、まーぬ神やてぃん、んまぬ人んちゃーが 創てーる神どぅやいーびーる。ユダヤ人ぬ神んでぃーしん、ユダヤ人が、創てーる神どぅやいびーくとぅ、まー迄ん、ユダヤ人ぬ為ぬ神どぅやいびーくとぅ、ユダヤ人が んまぬ土地ぇーましやっさーでぃち、思とーたくとぅ、んまんかいや 他ぬ人んちゃーが居たしが、うまぬ土地ぇーユダヤ人ぬ物やさ、でぃち、ユダヤ人ぬ神が ユダヤ人(じ)ぬかい 言いたんでぃち、言ちょーいびーん。やまとぅん人ん ユダヤ人風儀 やいびーんどー。やまとぅん人や 北海道や 昔から やまとぅぬ物やたんでぃち、言ちょーいびーんどー。やくとぅ、我ねー、やまとぅん人や、うちなーん、昔から やまとぅぬ物やたんでぃち、やがてぃ やまとぅん人が 言い始みらんがやーでぃち、今から しわそーいびーしが、うんじゅなーや 如何風儀 考えーやいびーやがやー? 二千円札んかい「守禮之門」が描かっとーしが、うれーうちなーや、うちなーん人ぬ物ーあらん、やまとぅん人ぬ物どぅやんどーでぃち、世界中んかい 向かてぃ、言ちょーる印、証拠やいびーん。うりびけーのーあらん、「琉球処分」でぃーせー、間違てー無ーらんでぃち、言ちょーいびーんどー。やまとぅ人や アメリカー、今ぬ所ー、此ぬ世ぬ中wuてぃ 一番強うさくとぅ、でぃち、アメリカんかい たっくゎとーしが、アメリカが一番でぃーしん、何時迄がやら 分らん。広辞苑 見じーねー、「沙羅双樹の花の色、盛者(じょうじゃ)必衰の理をあらわす」でぃち、書かっとーいびーん。うれー平家物語―読まんてぃん、またゴータマが言ちゃんでぃち、言ゃっとーる諸行無常でぃーせー、分からんてぃん、ローマ帝国がちゃーなたがんでぃーしん、見じーねー、良ー、分わかいびーん。んかしぬゲルマン人でぃーせー ローマ帝国からしーねー野蛮人でぃち、考えーらっとーたんねーやいびーん。アメリカが一番でぃーせー、何時迄がやら 分らんくとぅ、ユダヤ人(じ)のー、パレスチナ人とぅ おうらんせー、ませーあらんがやーでぃち、思とーいびーん。此ね間、テレビ見ちょーたしが、一人ぬパレスチナ人ぬ話聞ちゃしが、イスラエルでぃーぬ ユダヤ人ぬ国が造らりーる前や、パレスチナ人ぬん、ユダヤ人ぬん、ちゅけー隣いwuてぃ、暮らち、互ーに、招待さい、また招待さったい、さーに、おーえーん、さん如し、暮ちょーたんでぃーぬ事やたしが、あんあらんねーユダヤ人のー、生ちちぇー、行からんりち、考えげーとーいびーん。ユダヤ人があまwuてぃ、生ちち、行ちゅぬ為ねー、パレスチナ人、アラブ人とぅおーてーならん、今ーアメリカが後んかい、立っちょーくとぅガザぬ人んちゃーが自由に、出じららん如し、苦しみとーしが、アメリカが弱く成てぃ行じ、銭ぬん無ーらんなてぃ、加勢しーさんないねー、如何ないがやーでぃーぬ事、考えーいね ユダヤ人が ちゃっさ、耄者やてぃん、うぬあたいや、分かいる筈やしがやーでぃち、思とーびーしが、如何やいびーがやー?

我ねー、月曜日や 学校かい 行かんしーが、今度ぬ正月ぇー、新ぬ一月二十六日ぬ月曜日んかい 当たとーたくとぅ、休みやたしが、二日、三日ー休めーあらんたくとぅ、良い正月でぃちぇ、言ゃらんでぃち、思とーいびーん。やまとぅん人が 昔ぬ正月、うちなー正月、アジアぬ正月んかい直さねー、如何ん成らんさやー でぃち、思とーいびーん。やまとぅwuてー 如何ん 成らんしが、何でぃち、うちなーwuてぃん、やまとぅん人ぬ真似さねー成らんがでぃち、思とーびーん。うちなーwuてー、うちなー正月、アジアぬ正月 すせーましやさでぃち、思とーいびーん。

2009年 正月ぬ十一日(新ぬ二月五日)

なかんだかり てつまさ


 註:あっちゃーちょーん=あっちゃあ、あちゃあすぬ事
   ふくたーむし=蓑虫