うちなあぐち散文会
          
作品集14
  トップページへ戻る
  散文会作品一覧へ戻る
読者投稿    ナカンダカリ (茨城)
 平成
20


 はいさい!

 
ヤマトゥwuテーひーくなとーしが、かじんひかん、びょうきんかいん かからん、ちゃーがんじゅうそういみせーがやー?
 わんねー やまとぅしょうぐぁちぬ いっしゅうかんぐれいめーやたらはじやしが、コンピューター ちかてぃ すぐとくそーたしが、きぶんがわるくなてぃ すぐすぐとーやみてぃ うへーゆくらねーならんでぃち うむてぃ にんたしが だー なー うりから うきーんしさん むぬん かびぶだこーねーらんなてぃ むぬんかまん ちゃーにんじそーたしが きぶんぬわっさぬ じくじくーすせー ちゃっさ にんてぃん のーらんくとぅ つぎぬひーぬ あさん うけーめーぐゎ たくちみくち かでぃ にんとーたしが にんとーるうっぴせー のーらんくとぅ くれー びょういんかい いかねーならんでぃち うむてぃ とぅじんかい まっすぐはかいねー 1キロメーターぐれーはなりとーるとぅくまんかいある 西間木(にしまき)びょういんかい でんわかきらち おうしんぬ あいがすらでぃち とぅーらちゃくとぅ、おーしのー せーねーらんくとぅ きゅうきゅうしゃか タクシーさーに くーでぃーぬ はなしーやたん。タクシーぬかわいに きゅきゅうしゃさーに いちゅるくとーならんくとぅ タクシーぐぁいしゃんかい でんわかきらち タクシーゆばちゃん。わんねータクシーぬくしwuてぃ にんとーたしが、げんきやいねー ぬーん うまーんし(かんげーらんし)が びょうきぬたみやしが なーうへー よーんなーあっかちとらしーね ましやしがやー でぃちうむたん。
 びょういんぬ めーwuてぃ タクシーから うりてぃ びょういんぬ なかんかいいっちゃしが、ちょうどぅ ひるぬやすみじかんやたしが、でんわかきてーたくとぅ にさんぷんぐれーまっちから しんさつしつんかい いっちゃしが、うまんかいや いしゃーwuーらん かんごふがいしゃんかい かんじゃが ちょーくとぅ すぐめーんそーりよーでぃち いんたーほーんさーに うにげーしから にさんぷんぐれーしから ちょーたしが さんじゅうなかばから しじゅうめーぐれーぬ ゐきがぬいしゃやたしが うぬいしゃー なまー いちょうぬかじんかい かかとーる ちゅんちゃーが まんどーどぅくとぅやくとぅ いちょうぬかじやさ むぬんかまらんぐとーくとぅ リンゲルうちゅせーましやさでぃち いいたん。うぬいしゃー かんごふんかい リンゲルうてぃよーでぃち いいちきてぃ すぐ wuーらんなたん。びょういんぬなかぬ ふかぬとぅくまwuてぃ すぐとぅそーんねーやたん。あんさーに かんぐふが わんにんかい リンゲルうっちとぅらすたしが、にさんじかんぐれーかかとーたん。くぬリンゲルでぃーぬくすいや ふんとーに まほうぬくすいやさ。リンゲルうつるめーや あんしわっさたるきぶんやしが、うぬくすいうっちからー むじらしいむんやさ じくじくーさんなとーたん。くすいうちうわてぃから かんごふが むし むぬ かみさんねー あちゃー にちようーやしが ひるまでーそーくとぅ リンゲルうちーがちゅーせー ましやさでぃち いいたしが、うぬばんぬゆーばんから むぬんかまりーたくとぅ なーちゃー リンゲルうちーが いかんたん。
 わんねー なままでー きぶんがわるくないねー うれー こーねんきしょうがい ぬたみやさ でぃち うむとーたしが とぅしん るくじゅうごー なてぃ やがてぃ るくじゅうるく ないくとぅ きぶんがないせー こーねんきしょうがいぬためーあらんはじでぃち うむとーん わんねー いしゃー あらんくとぅ ぬーぬたみに きぶんがわるくないがすらわからんしが コンピューターから んじとーる デンンジハとぅ かんけーそーせ まちげーねーらん でぃち うむとーん。ありから なあー ちゅちちぐれーなとーしが、なまやてぃん コンピューターちかいねー ゆくい ゆくい ちからねーならん。 うり ちゃーちかいしーねー デンジハが まじ みーから ちゅぶるんかい ちゃーに うりから いーんかい ちゅーん。
 わんねー なままでー やまとぅしょうぐゎちどぅ そーたしが くんどぅからー やまとぅしょうぐゎちびけーのあらん うちなーそーぐぁちん すぬくとぅんかいさしが、うぬやまとぅしょうぐゎちでぃーしん んーかしから やまとぅんちゅーが そーたせーあらん やまとぅんちゅうーが 植民地主義者ぬ ねーび さーなかい あんあとーん。1872年12月3日(ちちぬくゆみ)が1873年1月1日でぃち きみてぃあとどぅ やまとぅんちゅーん やまとぅしょうぐゎちそーる うりまでー やまとぅんちゅうーん しぜんぬ(きゅうぬ) しょうぐゎちどぅ そーたん。
 くんどぅぬ しょうぐゎちぇー2月7日(でぃだぬくゆみ)やしが、やまとぅ うてぃん うちなーうてぃん やすめーあらんしが、ちょうせんwuてー三日やすみ、ちゅうごくwuてー「しゅんせつ」でぃち いっしゅうかんぐれー やすみ でぃちょーん。やまとぅしょうぐゎちに はちはる(初春)りーせー あたてーねーらん くとぅしぬ はるや しわーしぬ にじゅうはちにち(しんぬ にんぐゎち ゆっか)からぬ はじまいる。うちなーしょうぐゎちぇー しんぬ にんぐゎちぬ なぬかあたとーん。あんやくとぅる うちなーしょうぐゎちねー はちはるないる。やまとぅんちゅーん、んかしー(1872にんまでー)しょうぐゎちねー はちはる なとーたくとぅ wuかしこねーらんしが、なまぬ やまとぅしょうぐゎちぇー はちはろー あらん でーじな ひーくないる とぅちる やくとぅ 「はちはるぬ ういうぇー」でぃーせ まちがとーん、やくとぅ やまとぅんちゅうーや「はちはるぬ ういうぇー」や あらん、「まふゆんかい んーかてぃぬういうぇー」でぃち かちゃい いちゃいさねー ならん。
 うちなーwuてー しょうぐゎちびケーの あらん くとぅばまでぃん やまとぅんちゅうーぬ ねーびさーに くんどー めーなち うちなーぬ くとぅばちからねーならんでぃち いゃっとーるぐとーしが、でーじな むちかさんやー。わったーが わらびやたいねー(こうこうまでぃ) がっこうwuてぃん しんしーが wuーぬとちびけーんどぅ やまとぅぐちぇーちかとーたしが、なまぬ わらばーたーや、やーwuてぃん やまとぅぐち ちかとーくとぅ めーにち うちなーぬくとぅば ちかいでぃーせ でーじな むちかさん でぃち うむとーしが、なまやれー まにあーあいがすら わからんしが、うちなーぬくとぅばちかいするちゅんちゃーが wuーらんなてぃから ちゃーんならんくとぅ、なまからやてぃん はじみーせーましやさ。まじ がっこーwuてぃん「うちなーぬくとぅば」ぬ じかんとぅてぃ わらばーたんかい ならーさねーならん。また うりびけーのあらん、けんぬぎかい wuてぃん、し、ちょう、そんぬぎかいwuてぃん うちなーぬくとぅばちからねーならん でぃち うむとーん。うちなーぬくとぅばがわからんないねー、うちなーぬうたん しばいん わからんなてぃいちゅくとぅ んーなさーに うちなーぬくとぅば ちかてぃ いつせーましやさ。うちなーんちょー くとぅばびけーのあらん くくるまでぃん やまとぅんちゅーふーじーなとーるちゅんちゃーがwuーんねーやしが、やまとぅんちゅうーが うちなーんちゅぬ くくる わかいんでぃーせー てぃんかい はしかきーしとぅ ゆぬむんやさ、うぬくとー ほっかいどーんかい いちゃーに あいぬじんぬ むらんかい いちーねー ゆーわかいん。やまとぅちゅうーや、あいぬじんのー るーなとぅ ゆぬ ちゅでぃちぇーうむてーねーらん。あいぬじん 美ケーのアラン、うちなーんちゅん、ちょーせんじぬん ゆぬむんやさ、やまとぅんちゅうーや、るーなーびけーんどぅ にんじんでぃち うむとーん。
 あんるやしが、また みじらしーやまとぅんちゅーが wuーしん うりん ふんとーやさ。くねーだぬくとぅやしが そうべつかいが あたしが、うまwuてぃぬ はなしーやしが、「みかめ」でぃーぬ ふくしまんちゅやしが うぬしんしーが わんにんかい ぬーでぃち うちなーや どくりつ さんが でぃち いいたん。うぬしんしーや うちなーびけーのあらん ほっかいどうーんどくつさねーならん、うりから 天皇制ん ねーらんなさねーならん でいち いいたん。わんにん うちなーん、ほっかいどーん どくりつ さねー ならん、天皇制ん とーさねーならんでぃち うむとーしが、うぬしんいしーと わんとぅ かんがーかたが ゆぬむんやたん。やまとぅんちゅうーや むるふりむんどぅやしが、なかねー むぬ わかいぬ ちゅんちゃーが wuーしん まちげーや ねーらん。あたいめーぬくとぅやしが、やまとぅんちゅうーびけーのあらん、まーんかい やなっちゅん wuーれ、ゐいっちゅん wuーせ まちげーやねーらん。うちなーんちゅん ゐいっちゅびけーのあらんくとぅやー。

    2007にん しわーしぬ にじゅうぐにち(しんぬ にんぐゎち てぃーたち)

                         
                          ナカンダカリ