うちなあぐち散文会
          
作品集12
  トップページへ戻る
  散文会作品一覧へ戻る
読者投稿    ナカンダカリ (茨城)
 平成
1712


ちゃーがんじゅうやいびーがや!

 ひーく なたくとぅ、あさへーこー うきーかんてぃーそーさぁ。がっこうかい いちぃーね、4じぐれーねーうきてぃ、うりから ちらあらてぃ、ちゃーわかち、むぬかでぃ、しこーいむこーいしから、5じぐれーねーやーから んじてぃいかねーならんしが、だーひーくなたくとぅ、くるまぬガラスんかい ちちょーるしむん、こーりんとかさねーならんくとぅ うぬたみねー あちゆーむっちいかねーならんくとぅ あちゆーびん たーちんかい あちゆーいりらねーならんくとぅ ひまだーりやさ。あんやくとくよー、にんずるめーwuてぃ てぃーちぬ あちゆーびんかいや あちゆーいってぃうちぇーん。

なまじぶんの、4じでぃーね なーだ ゆーんあきらんくとぅ くらさぬ、とちぃーぐゎーぬ じーん、みーぐりさぬ、なんくゎいん んーじけーさー さねならん。あんそーてぃん 4じに うきーせー でーじなむちかさん、くねーだぬくとぅやしが、とー、4じはん なとーさやー、つーや はんじかんうくりとーさやー うへーいしがねーならんさやー りちうむてぃうきてぃ かまぬめー(キッチン)ぬとちぃーぐゎーんーちゃくとぅ4じはのーあらん、さんじはんどぅやたしが、だー、うきてぃからー なーにんららんくとぅ うぬままうきてぃなじゃしが、あさ はんじかん へーくんじーねーくるまー おほーこーあっちぇーねんくとぅ くるまー あっかしやっさん。また うりびけーのあらん。がっこうーんかいや はんじかのーあらん 45ふんから いちじかんびけーんへーくちつん。あさへーくうきてぃん、 がっこうかい いちーねー にーぶいさんしが、がっこうから けーてぃちーねー にーぶいすくとぅ あまくまをてぃ ゆくいがなー けーてぃ くーねならんくとぅ なげーかかいん。わんねー じかんがあいねー とぅーまーいし けーてぃつーん。

つぅーや、やしみやくとぅ  ちぬーや、がっこうから6じ10ぷんぐれーに んじてぃ「いわき」ぬ やまぬいいんかい ぬぶてぃ うまをてぃ べんとう(るーくる やちぇーるライむじパンぬかい、じーまみバターとぅブルーベリージャムちきてぃ チーズはさでーるサンドイッチ)かでぃ ゆくてぃから うりから、45ふんぐれー やまぬいいあっかち、やまからうりてぃ やまつりまち(福島県、だいごまちぬとぅない)ぬ いりーむてぃんかい んじてぃ、だいごまち(茨城県、やまつりまちぬとぅない)んかい いっち、うまぬ みちぬすばぬ ひじぇーんかい くるまとぅみてぃ ゆくらーりるとぅくまの「みちぬえき」をてぃ ゆくてぃから、「かさま」から「いわせ」でぃぬ ぐなまちぐぁーぬ まちぬまんなかとぅーてぃ んじ、うりから みちぬすばぬ ひじぇむてぃーんかいあいる「くるまとぅみらりーるとぅくま」(パーキングエリア)wuてぃ くるまとぅみてぃ ゆくてぃから、「しもつま」までんじ、うまんかいや、「じゃすこ」でぃーぬ まぎまちや(スーパーマーケット)があくとぅ、うぬまちやてぃ こーむんさしが、だー あさ、やーから んじーねー ちゃーん ぐまびんぐゎー たーちんかい いってぃ むっち ちゅーしが、なーねーらんなとーくとぅ ちゃーんこーてぃ ぬでぃ、ぱんぬこーてぃ かでぃゆくてぃから けぇーてぃちゃしが、つぅーぬ1じぐるに やーかい ち ちょーたん。にねんめーまでー わんねー 「きょうようぶ」んかい wu−たくとぅ「どいつご」びけーんそーけすむたしが、くづからー きょうようぼーねーんなてぃ なまや 「ひょうげんぶんかがっか」んかい wu―くとぅ くずから 「どいつご」びけーのあらん 「せいようぶんかがいろん」でぃしん むたさってぃ うぬたみねー げるまんじん、ろーまていこく(なまぬあめりかていこくふーじー)、カエサル、アントニウス、アウグストゥス(オクタヴィアヌス)から、エジプトぬクレオパトラまでぃん べんきょうしみらっとーん。また くんどぅからー 演習(ゼミナール)んむたさってぃ(わんねーかみん ふとぅきん しんじらん ふりむん(無心論者)やしが、しちぐゎちまでー宗教ぬ話、くんぐゎちからードフトエフスキーがかちぇーる「ちみ とぅ ばつ」でぃーる小説ゆどーん)。うりから「ぶたいげいじゅつろん」までん むたさっとーん。うぬ「ぶたいげいじゅつろん」ぬ じゅぎょう wuてー ぬーそーがてぃーねー、1791にんに 「うた」−「もーつぁるとぅ」(1756−1791)が つくてーしが、「しばい」や 「しかねーだー」(1751−1812)でぃーぬちゅがつくてーるSingspiel紙芝居(歌劇)[Die Zauberflote(ひるましいふえ)]ちちゃい、ゆだいそーしが、「どいつご」ならとーるちゅんちゃーや うひぐゎーどぅ wu−くとぅ、まじぇーどいつごぬ ゆみかたから はじみてぃ、うぬいみんわからんねー ならんくとぅ たった はんとぅし(くんぐゎちぬ うわいぐるから いちぐゎちぬとーかまでぃ)どぅやくとぅ ゆだい、ちちゃい、んーちゃいすせー うひぐゎーしかならん。

うちなーそーぐゎちぇー なまから たちちあとぢぅやしが、やまとぅそーぐゎちぇー やがてぃ ちぅーん。

くぬゆーんかいや、かわらんせーねーらんくとぅ うちなーそーぐゎちん やまとぅそーぐゎちん いいそーぐゎちしんそーりよ。2006にんぬ しわすぬ じゅうゆっか

なかんだかり てつまさ(てっちゃん)

やにからーいちちょーんでぃーぬてがめーやまとぅそーぐゎちぬめーwuてーあらん、うちなーそーぐゎちめーwuてぃ んじゃすぬかんげーやいびーん。

しぐにのーとぅまりらりーくとぅ とぅまいが めんそーりよー

――――――――――――――――――――――――――――――――――――――――

 

*漢字使用んかい修正(うゎあばぐとぅんでえ思いやすしが、漢字混んきやびてぃんちゃん)

 

寒ーく 成たくとぅ、朝早ーこー 起きーかんてぃーそーさぁ。学校かい 行ちぃーね、4時ぐれーねー起きてぃ、うりから 面洗てぃ、茶沸かち、むぬ食でぃ、支こーいむこーいしから、5時ぐれーねー家から 出じてぃ行かねー成らんしが、だー寒く成たくとぅ、車ぬガラスんかい 付ちょーる霜ん、氷ん溶かさねー成らんくとぅ うぬ為ねー 熱湯持っち行かねー成らんくとぅ 熱湯瓶 二ちんかい 熱湯容りらねー成らんくとぅ 暇だーりやさ。あんやくとくよー、寝んずる前wu(於)てぃ 一ーちぬ 熱湯瓶んかいや 熱湯容ってぃ置ちぇーん。

今時分の、4時でぃ言ね 未だ 夜ん明らんくとぅ 暗さぬ、時計ぐゎーぬ 字ん、みー苦さぬ、何回ん 見じ返さー さね成らん。あんそーてぃん 4時に 起きーせー でーじな難かさん、くね間ぬ事やしが、とー、4時半 成とーさやー、今日や 半時間遅りとーさやー うへー急がねー成らんさやー りち思てぃ起きてぃ 窯ぬ前(キッチン)ぬ時計ぐゎー見ーちゃくとぅ4時半のーあらん、3時半どぅやたしが、だー、起きてぃからー なー寝んららんくとぅ うぬまま起きてぃなじゃしが、朝 半時間 早く出じーねー車ー 多こー歩ちぇー無んくとぅ 車ー 歩かし易っさん。また うりびけーのあらん。学校ーんかいや 半時間のーあらん 45分から 一時間びけーん早くちつん。朝早く起きてぃん、 学校かい 行ちーねー 眠ぶいさんしが、学校から 帰てぃ来ーねー 眠ぶいすくとぅ あまくま於てぃ ゆくいがなー 帰てぃ 来ーねならんくとぅ 長ーかかいん。我ねー 時間があいねー 遠回ーいし 帰てぃ来ーん。

今日や、休みやくとぅ  昨日や、学校から6時10分ぐれーに 出じてぃ「いわき」ぬ 山ぬ上んかい 登てぃ うま於てぃ 弁当(自くる 焼くぇーるライ麦パンぬかい、地豆みバターとぅブルーベリージャム付きてぃ チーズ挟でーるサンドイッチ)食でぃ ゆくてぃから うりから、45分ぐれー 山ぬ上歩っかち、山から降りてぃ やまつりまち(福島県、だいごまちぬ隣)ぬ 西むてぃんかい でじてぃ、だいごまち(茨城県、やまつりまちぬとぅない)んかい 入っち、うまぬ 道ぬ傍ぬ 左んかい 車停めみてぃ ゆくらーりる所の「みちぬえき」於てぃ ゆくてぃから、「かさま」から「いわせ」でぃぬ ぐな町ぐぁーぬ 町ぬ真ん中とぅーてぃ 行じ、うりから 道ぬ傍ぬ 左むてぃーんかいあいる「車停みらりーる所」(パーキングエリア)wuてぃ 車停みてぃ ゆくてぃから、「しもつま」迄行じ、うまんかいや、「じゃすこ」でぃーぬ まぎまちや(スーパーマーケット)があくとぅ、うぬまちやてぃ 買物さしが、だー 朝、家から 出じーねー 茶ん ぐま瓶ぐゎー 二ちんかい 容ってぃ 持っち 来ゅーしが、なー無ーらんなとーくとぅ 茶ん買―てぃ 飲でぃ、ぱんぬ買てぃ 食でぃゆくてぃから 帰てぃ来ゃしが、今日ぬ1時ぐるに 家かい 着 ちょーたん。2年前迄ー 我ねー 「きょうようぶ」んかい wu−たくとぅ「ドイツ語」びけーんそーけ済むたしが、去年からー 教養部ー無ーんなてぃ 今や 「表現文学科」んかい wu―くとぅ 去年から 「ドイツ語」びけーのあらん 「西洋文学概論」でぃしん 持たさってぃ うぬ為ねー ゲルマン人、ローマ帝国(今ぬアメリカ帝国ふーじー)、カエサル、アントニウス、アウグストゥス(オクタヴィアヌス)から、エジプトぬクレオパトラ迄ん 勉強しみらっとーん。また 今度からー 演習(ゼミナール)ん持たさってぃ(我ねー神ん 仏ん 信じらん 耄者(無心論者)やしが、七月迄ー宗教ぬ話、九月からードフトエフスキーが書ちぇーる「罪 とぅ 罰」でぃーる小説読どーん)。うりから「舞台芸術論」迄ん 持たさっとーん。うぬ「舞台芸術論」ぬ 授業 wuてー 何そーがて言ーねー、1791年に 「うた」−「モーツアルト」(1756−1791)が 創くてーしが、「芝居」や 「シカネーダー」(1751−1812)でぃーぬ人が作てーるSingspiel紙芝居(歌劇)[Die Zauberflote(ひるましいふえ)]聴ちゃい、読だいそーしが、「ドイツ語」習とーる人んちゃーや うひぐゎーどぅ wu−くとぅ、先じぇードイツ語ぬ 読み方から 初みてぃ、うぬ意味ん分からんねー ならんくとぅ たった 半年(九月ぬ 終わい頃から 一月ぬ10日迄)どぅやくとぅ 読だい、聴ちゃい、見ちゃいすせー うひぐゎーしかならん。

うちなー正月ぇー 今から 二月後ぢぅやしが、ヤマト正月ぇー やがてぃ 来ぅーん。

くぬ世んかいや、変わらんせーねーらんくとぅ うちなー正月ん ヤマト正月ん 良い正月しんそーりよ。2006年ぬ 師走ぬ 十四日

なかんだかり てつまさ(てっちゃん)

来年からー生ちちょーんでぃーぬ手紙ーヤマト正月ぬ前wuてーあらん、うちなー正月ぬ前wuてぃ 出じゃすぬ考えーやいびーん。

直ぐにのー泊まりらりーくとぅ 泊まいが めんそーりよー